Թուրքական Anadolu գործակալության փոխանցմամբ, Թուրքիայի էներգետիկայի ու բնական պաշարների նախարար Թաներ Յըլդըզը մասնակցել է Կիևում տեղի ունեցած միջուկային անվտանգության գագաթնաժողովին` արծարծելով Մեծամորի ատոմակայանի փակման խնդիրը.
«Չեռնոբիլի վթարից անցել է մոտ 25 տարի: Դրա հետևանքների վերացման համար ՄԱԿ-ն ու ԵՄ-ը հավաքեցին 540-550 միլիոն եվրո: Թուրքիան անմասն չի մնացել դրանից և հատկացրել է 1 միլիոն եվրո:
Սա այնպիսի խնդիր է, որ աշխարհի ոչ մի երկիր չի կարող անտարբերություն ցուցաբերել միջուկային վթարների հանդեպ: Դրա վառ օրինակը «Ֆուկուսիմա» ատոմակայանում գրանցված վթարն է, որի ժամանակ նրանից 8000-10.000 կիլոմետր հեռավորության վրա ընկած երկրները Ճապոնիային օգնելու իրենց պատրաստակամությունը հայտնեցին:
Չեռնոբիլի վթարից հետո աշխարհում կառուցվել է 140 ատոմակայան: Ընդհանուր առմամբ, աշխարհում կառուցվել է 442 ատոմակայան, կառուցման գործընթացում է գտնվում ևս 65-ը:
Բացի այդ, այսօրվա դրությամբ աշխարհում գործում են 40 տարվա վաղեմություն ունեցող 26 ատոմակայններ: Անհրաժեշտ է բարձրացնել դրանց փակման հարցը: Մեծամորի ատոմակայանը նույնպես դասվում է դրանց թվին: «Անհրաժեշտ» է հնարավորինս շուտ փակել այն:
Մեր հարևան Հունաստանն անհանգստացած է նրանից, որ մենք ցանկանում ենք միջերկրածովյան Մերսին նահանգի Աքքույու վայրում կառուցել մեր առաջին ատոմակայանը: Աթենքն Աքքույուից գտնվում է 900 կիլոմետր հեռավորության վրա, մինչդեռ, չգիտես ինչու, Հունաստանը չի անհանգստանում Աթենքից 600 կիլոմետր հեռավորության վրա գտնվող բուլղարական ատոմակայանից:
Փարիզի նման խոշոր զբոսաշրջային քաղաքից ընդամենը 90-100 կիլոմետր հեռավորության վրա գտնվում են միանգամից 7 ատոմակայաններ: Ընդհանրապես, Ֆրանսիայում արտադրվող էլեկտրաէներգիայի 75-78 տոկոսն ունի ատոմային ծագում»:
Հիշեցնենք, որ Կիևի միջուկային գագաթնաժողովին մասնակցել է նաև Ադրբեջանի վարչապետ Արթուր Ռասիզադեն, որը նույնպես միջազգային հանրության ուշադրությունը հրավիրել է Մեծամորի ատոմակայանի փակմանը:
