Այսօր ԱԻՄ նախագահ, նախագահի նախկին թեկնածու Պարույր Հայրիկյանի փաստաբան Լևոն Բաղդասարյանը լրագրողների հետ հանդիպմանը նշեց, որ Պարույր Հայրիկյանի իրական պատվիրատուները, իրենց կարծիքով, դեռ կալանավորված չեն, և իրենք ցանկանում են, որ օբյեկտիվ նախաքննություն անցկացվի: Նրա խոսքով՝ սա ուղղված էր պետության և քաղաքական գործիչ Պարույր Հայրիկյանի դեմ:
Փաստաբանը ընթերցեց Պարույր Հայրիկյանի հայտարարությունը:
«Ոճրագործին չհաջողվեց վերացնել քաղաքական գործչին, իսկ քաղաքական գործիչն արեց իրենից կախված ամեն ինչ, որպեսզի երկիրը չգնա ոճրագործի պատվիրատուի գծած ճանապարհով: Արդյունքում Պարույր Հայրիկյանը ոչ միայն հաշմվեց և ունեցավ առողջության տևական քայքայում, այլ նաև կորցրեց ընտրողների այն ձայները, որը կարող էր ստանալ, եթե հանցագործությունը տեղի չունենար:
Կարճ ժամանակ անց, ըստ նախաքննության մարմնի տեղեկատվության, ձերբակալվեցին, այնուհետև կալանավորվեցին կատարողները, իսկ հետո՝ դրանց պատվեր տվողը: Չցանկանալով կասկածի տակ առնել նախաքննության մարմնի պրոֆեսիոնալիզմն ու օպերատիվությունը, ավելին՝ ըստ արժանվույն գնահատելով դեպքից անմիջապես հետո ազգային անվտանգության ծառայության և ոստիկանության համատեղ միջոցառումները՝ Պարույր Արշավիրի Հայրիկյանը գտնում է, որ սույն քրեական գործով կալանավորված անձինք ընդամենը այդ հրեշավոր հանցագործության, հանցագործություն, որն ուղղված էր ինչպես Պարույր Հայրիկյանի անձի, այնպես էլ երկրի անվտանգության դեմ, փոքրագույն մասնիկն են, ինչպես նաև հաշվի առնելով հանցագործության բնույթն ու հասարակական հնչեղությունը՝ հրապարակայնորեն պետական լիազոր մարմնից պահանջվում է ողջամիտ ժամկետում բացահայտել իրական պատվիրատուին (պատվիրատուներին), որի հանձնարարությամբ 2013-ի հունվարի 31-ին քաղաքական գործչի նկատմամբ տեղի ունեցավ հանցագործություն՝ մահափորձ, որն ավարտին չհասցվեց ոչ իրենց կամքով»,- գրված է հայտարարության մեջ:
Ի դեպ, Պարույր Հայրիկյանի առողջական վիճակը լավ չէ, ավելին՝ կրակոցից ճզմվել է նրա նյարդային համակարգը: Առողջապահության նախարարության ցուցումով նրա բուժումը պետք է շարունակվի արտերկրում:
Հանցագործության բացահայտման ողջամիտ ժամկետը, ըստ փաստաբանի, կարող է տևել երեքից հինգ ամիս:
