Իսրայելի վարչապետ Բենիամին Նեթանյահուն պարզեցրել է նախարարների կաբինետը, սակայն նոր «չստուգված» քաղաքական գործիչները կարող են բարդացնել Իրանի վրա հարձակում իրականացնելու որոշման ընդունումը: Այս մասին հայտնում է Reuters գործակալությունը:
Այսպես կոչված՝ «նեղ» կաբինետի (7 նախարար) հանդիպումն անցկացվել է երկուշաբթի՝ որպես նոր աջ կենտրոնամետ կառավարության մաս: «Այդ հանդիպման գլխավոր նպատակն էր Իրանին հետ պահել միջուկային զենքով զինվելու մտքից»,-ասել է վարչապետ Նեթանյահուն:
Մոտավորապես կրկնակի կրճատված նախարարների կաբինետում երեք նոր նախարարներ են ընդգրկվել՝ Յաիր Լապիդը, Նաֆթալի Բենետը և Գիլադ Էրդանը:
«Իրանի դեմ հարձակմանը կողմ կամ դեմ քվեարկելու համար երեք նախարարները պետք է լավ տեղեկացվեն այդ հարցում, իսկ դա կտևի առնվազն 3 ամիս»,- ասել է Նեթանյահուի նախկին կառավարության անվտանգության կոմիտեի պաշտոնաթող աշխատակիցը:
Այսօր Իսրայել այց կատարելիք ԱՄՆ նախագահ Բարաք Օբամայի հետ բանակցությունների գլխավոր թեման կլինի իրանական հարցը՝ հայտարարել է Նեթանյահուն:
Համաձայն իսրայելական օրենքների՝ պատերազմը պետք է հավանության արժանանա ողջ կաբինետի կողմից:
