Ադրբեջանական Trend լրատվական գործակալության փոխանցմամբ՝ Ադրբեջանը Թուրքիայից գնելու է ևս 30 վագոն՝ «Բաքու-Թբիլիսի-Կարս» (ԲԹԿ) երկաթուղով ուղևորներ փոխադրելու համար։ Այդ մասին հայտարարել է «Ադրբեջանական երկաթուղիներ» ընկերության մամլո ծառայության ղեկավար Նադիր Ազմամեդովը։
Նրա խոսքով՝ բանակցություններն արդեն իսկ ավարտված են, և վագոնները պատվիրված են։ Ազմամեդովը նշել է, որ գնացքները լինելու են հարմարավետ, և որ վագոնները ստացվելու են հաջորդ տարի: «Դրանք համապատասխանելու են ժամանակակից չափորոշիչներին, wi fi համակարգից բացի՝ ունենալու են նաև մի շարք նորարարություններ։
Ուղևորները կկարողանան Կարս հասնել ընդամենը մեկ օրում։ Ինչ վերաբերում է ուղեվարձին, ապա այն համաձայնեցված է Վրաստանի ու Թուրքիայի կառավարությունների հետ։ Մինչև ընթացիկ տարեվերջ ԲԹԿ-ով կմեկնարկեն բեռնափոխադրումները»,- ասել է նա։
Նախատեսվում է, որ սկզբնական շրջանում ԲԹԿ-ն տարեկան տեղափոխելու է 1 միլիոն ուղևորի և 6.5 միլիոն տոննա բեռ։ Տարեկան բեռնափոխադրման առավելագույն ծավալը կազմելու է 17 միլիոն տոննա։
