Ռումինիայի կառավարությունը նախագահ Տրայան Բեսեսկուին զրկել է անձնական ինքնաթիռից: Ինչպես այսօր լրագրողներին տեղեկացրել է նախագահի մամլո քարտուղարը, այդ պատճառով Բեսեսկուն Հռոմի պապ Ֆրանցիսկոսի օծմանը սովորական ինքնաթիռով է մեկնել: «Նախագահը Հռոմ է մեկնել և այնտեղից կվերադառնա իտալական ընկերության ինքնաթիռով»,- ասել է մամլո քարտուղարը:
Անցած շաբաթ Բեսեսկուն իր վրդովմունքն էր հայտնել այս իրավիճակի հետ կապված և հայտարարել էր, որ «նախագահը չպետք է թռչի սովորական ուղևորների հետ։ Նա պետք է հնարավորություն ունենա ցանկացած պահի վերադառնալ իր երկիր, երբ, օրինակ, ինչ-որ արհավիրք է տեղի ունեցել, ասենք՝ երկրաշարժ: Նա չի կարող իր ժողովրդին բացատրել, որ 8 ժամ ուշացել է, քանի որ ինքնաթիռ չունի»:
Ռումինիայի տրանսպորտի նախարարն էլ բացատրել է, որ «նախագահի ինքնաթիռի սպասարկումը բյուջեին տարեկան 7 միլիոն դոլար է արժենում, որը ավելի նպատակահարմար է տնտեսել՝ հաշվի առնելով ճգնաժամը»:
