Գյումրու Շտապբուժօգնության կայանը քաղաքը սպասարկում է ընդհանուր առմամբ 12 ավտոմեքենայով, սակայն ամեն օր աշխատանքի են դուրս գալիս 4 ավտոմեքենա:
Օրական ՇԲՕԿ կանչերի թիվը հասնում է 60-70-ի: Ամառային այս սեզոնին նկատվում է կանչերի թվի աճ՝ պայմանավորված եղանակային շոգ պայմաններով: Վերջին քսան օրերին օրական կանչերի թիվը հասնում է 70-75-ի:
«Առաջին լրատվական»-ի հետ զրույցում կայանի տնօրեն Ռոբերտ Թորոսյանը նշեց. «Ամառային այս շոգերի հետ կապված կանչերի թիվն ավելացել է տարեկան միջին ցուցանիշից 10-15 կանչով: Գյումրեցիների մոտ հիմնականում նկատվում է մշտառկա /խրոնիկ/ հիվանդությունների սրացում. խոսքը հիպերտոնիկ հիվանդների, սրտանոթային համակարգի հետ կապված հիվանդություններ ունեցողների մասին է: Օրական միջին ցուցանիշով Գյումրիում գրանցվում է երկու ինֆարկտ, մեկից երկու ինսուլտի դեպք»,- նշեց Ռ. Թորոսյանը՝ հավելելով, որ կանչերը սպասարկում են ժամանակին` կանչի գրանցումից հետո 3-4 րոպե տևողության ընթացքում մեքենան հասնում է դեպքի վայր:
Ի դեպ, պարոն Թորոսյանը նաև մանրամասնեց, որ վատ երևույթ է սկսել ի հայտ գալ Գյումրիում՝ կապված ալկոհոլի չարաշահման հետ: Ըստ նրա՝ կանչերի 20-25 տոկոսի դեպքում հիվանդի մոտ առկա է ալկոհոլ օգտագործած և ոչ սթափ վիճակ, հանգամանք, որ խստիվ արգելվում է այս շոգ օրերին:
