Ճապոնական Fujitsu ընկերությունը ստեղծել է ծրագիր, որը թույլ է տալիս սմարթֆոնի տեսախցիկի կամ պլանշետային համակարգչի օգնությամբ չափել մարդու պուլսը: Այս մասին հայտնում է ITAR-TASS-ը՝ հղում կատարելով ճապոնական ԶԼՄ-ներին:
Fujitsu-ի մշակած հավելվածը կարող է տեղադրվել ցանկացած բջջային սարքի վրա: Տեխնոլոգիան հիմնված է լույսը սպեկտրի կանաչ մասից կլանելու՝ հեմոգլոբինի առանձնահատկության վրա։ Վերջինս ապահովում է արյան գնդիկների կարմիր գույնը։
Դրա հետ կապված՝ դեմքին արյան ամեն մղման ժամանակ մարդու դեմքի գույնը փոքր-ինչ փոխվում է: Fujitsu-ի հավելվածն ունակ է տեսախցիկի օգնությամբ հետևել գույնի փոփոխություններին ու դրա հաշվին չափել մարդու պուլսը:
Fujitsu-ում նկատում են, որ մշակված ծրագիրը պարզ է ու հեշտ կիրառելի:
Սեփական պուլսը չափելու համար հարկավոր է պարզապես մի քանի վայրկյան անշարժ նայել օբյեկտիվին: Ընդ որում՝ պուլսը չափելուն չի խոչընդոտի նաև դիմահարդարումը:
Ինչպես հաղորդվում է, հավելվածը շուկայում կհայտնվի 2013 թ. ֆինանսական տարում, որը Ճապոնիայում սկսվում է ապրիլի 1-ից:
