The History Channel հեռուստաալիքի հեռուստադիտողները «Աստվածաշունչ» սերիալի սատանային նմանեցրել են ԱՄՆ նախագահ Բարաք Օբամային: Այս մասին հայտնում է The Hollywood Reporter-ը:
Սերիալի հեռարձակումից առաջ սատանայի դերակատար, մարոկկացի դերասան Մուհամմադ Մեհդի Ուազաննիի և ԱՄՆ նախագահի նմանությանը ուշադրություն էր դարձրել լրագրող Գլեն Բեքը, իսկ հեռարձակումից հետո դրա մասին գրել են Twitter-ի բազմաթիվ օգտատերեր:
Սերիալի հեղինակները հերքել են կասկածներն այն մասին, որ նմանությունը դիտավորություն է եղել: Սերիալի գործադիր պրոդյուսերների և ալիքի ղեկավարության խոսքով՝ The History Channel-ը մեծ հարգանքով է վերաբերվում Օբամային, իսկ այն փաստը, որ ինչ-որ մեկը սխալ եզրակացություններ է արել դերասանի և նախագահի միջև նմանությունից, առաջացնում է հեղինակների ափսոսանքը:
Հեղինակները նշել են նաև, որ Ուազաննին սատանայի դեր է խաղացել նաև նախկինում այլ սերիալներում, որոնք էկրան են բարձրացել, երբ Օբաման դեռ նախագահ չէր: Ուազաննիի աշխատանքների թվում են այնպիսի պատմական ֆիլմեր, ինչպիսին է «Դավիթ թագավորը» (1997 ) և «10 պատվիրանները» (2006):
«Աստվածաշունչ» մինիսերիալի ցուցադրումը The History Channel-ով սկսվել է 2013-ի մարտի 3-ից: Այն արժանացել է քննադատների բարձր գնահատականին և ունի կաբելային հեռուստատեսության համար աննախադեպ վարկանիշ:
