Բրիտանական ոչ կառավարական ոստիկանական ասոցիացիան (Association of Chief Police Officers) քաղաքացիներին կբաժանի հարյուրավոր բացիկներ, որոնք ներծծված են մարիխուանայի եթերային յուղերով: Ինչպես հաղորդում է BBC News-ը, այդկերպ ասոցիացիան մտադիր է մարդկանց ծանոթացնել այդ բույսի հոտի հետ, որպեսզի վերջիններս կարողանան իրենց շրջապատում հայտնաբերել բույսի աճեցման պլանտացիաներ:
Կազմակերպության ներկայացուցիչ Էնդի Բլիսը հայտարարել է, որ շատերը անգամ գլխի չեն ընկնում, որ իրենց շրջանի որոշ տներում կամ բնակարաններում աճեցվում է վաճառքի համար նախատեսված մարիխուանա: Նրա խոսքով՝ ներկայում մարիխուանա է աճեցվում սովորական քաղաքային բնակարաններում:
Բացիկները, որոնք կուղարկվեն բրիտանացիներին, թույլ կտան որոշել մարիխուանա աճեցնողների բնակարաններն ու այդ մասին տեղեկություն հաղորդել ոստիկանությանը:
Հիմնականում, հոտավետ բացիկներ կուղարկվեն Հարավային Յորքշիրի, Մանչեսթերի ու Լոնդոնի բնակիչներին, որտեղ նկատվել են տնային պայմաններում մարիխուանայի աճեցման դեպքեր:
Մեծ Բրիտանիայում թմրանյութերի, այդ թվում՝ մարիխուանայի տարածումը քրեական հանցագործություն է համարվում:
