Մալաթիա-Սեբաստիա վարչական շրջանի ընդհանուր իրավասության դատարանում Ռոբերտ Պապոյանի նախագահությամբ ավարտվել է Սրբուհի Գ.-ի գործի դատական քննությունը:
22-ամյա Սրբուհու խնամքին դատական ակտ կայացնելու պահին նորածին երեխա կար:
Սրբուհուն մեղադրանք էր առաջադրվել տուժողի առողջությանը ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:
Սրբուհու նկատմամբ խափանման միջոց էր ընտրվել ստորագրությունը չհեռանալու մասին: Ազատության մեջ մնալով՝ Սրբուհին շուտով հղիացել էր ու դատական քննության պահին մեկ ամսական երեխայի մայր էր…
Ըստ դատական ակտի՝ 2014 թվականի ապրիլի 30-ին Սրբուհին ընկերոջ՝ Արմանի, վերջինիս ընկերոջ՝ Կոլյայի, տաքսու վարորդ Էդգարի ու ընկերուհիներ Անահիտի և Արմենուհու հետ իրենց բնակարանում օղի է խմել:
Գտնվելով ոգելից խմիչքի ազդեցության տակ՝ Սրբուհին ու Անահիտը վիճել են, քաշքշել են իրար:
Կանանց վիճաբանությանը միջամտել է Կոլյան, ով իր հերթին հայհոյանքներ է տվել Սրբուհու հասցեին, ապա մտել է ննջասենյակ՝ Արմանին արթնացնելու:
Կոլյայի հայհոյանքներից զայրանալով՝ Սրբուհին գնացել է խոհանոց, վերցրել է դանակը, Կոլյային հետևից մտել է ննջասենյակ ու դանակով դիտավորությամբ հարվածել է Կոլյայի մեջքի ձախակողմյան հատվածին՝ նրա առողջությանը պատճառելով ծանր վնաս՝ ձախ թոքի վնասումով:
Ընդհանուր իրավասության դատարանում Սրբուհի Գ.-ն իրեն մեղավոր է ճանաչել և միջնորդել է գործը քննել արագացված ընթացակարգով:
Դատարանը Սրբուհու պատասխանատվությունն ու պատիժը մեղմացնող հանգամանք է համարել պատիժ նշանակելու պահին նրա խնամքին նորածին երեխայի առկայությունը: Երեխան ծնվել է դեպքից հետո՝ 2015 թվականի հունիսի 24-ին:
Որպես պատասխանատվությունը ծանրացնող հանգամանք՝ դատարանը համարել է հանցանքը ալկոհոլի ազդեցության տակ կատարելը:
Ընդհանուր իրավասության դատարանը Սրբուհի Գ.-ին մեղավոր է ճանաչել տուժողի առողջությանը ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով, և դատապարտել է 3 տարի ազատազրկման:
Այս պատիժը կրելը դատարանը հետաձգել է՝ մինչև Սրբուհու խնամքին գտնվող երեխայի 3 տարին լրանալը՝ 2018 թվականի հունիսի 25-ը:
Դատարանը պարտավորեցրել է Սրբուհուն նշված ժամկետում առանց թույլտվության չփոխել մշտական բնակության վայրը: Երեխայից, ինչպես նաև նրան խնամելուց և դաստիարակելուց հրաժարվելու, նրան մանկատուն հանձնելու դեպքերի մասին դատապարտյալը պետք է հայտնի իր վարքագծի նկատմամբ վերահսկողություն իրականացնող մարմնին:
