Արմավիրի մարզի Արևիկ գյուղի կենտրոնական փողոցում գտնվող նախկին մանկապարտեզի կիսաքանդ շենքում այսօր բնակվում է 5 ընտանիք:
«Առաջին լրատվական»-ի հետ զրույցում տեղի բնակիչները նկատեցին, որ 5 ընտանիքներից 3-ը մշտական բնակիչներ են, տարիներ շարունակ ապրել են կիսախարխուլ շենքում, իսկ 2-ը գալիս են ամռանը՝ գյուղում աշխատելու:
Այստեղ հայտնված յուրաքանչյուր ընտանիք իր պատմությունն ունի, բայց այստեղ մեծից փոքր մի ընդհանրություն ունեն. 4-րդ դասարանի երեխայից մինչև ընտանքի հայր, մայր ֆիզիկական ծանր աշխատանք են կատարում ապրելու համար, ամռանը դաշտերում բերք են հավաքում՝ օրավարձով, իսկ ձմռանն էլ շատ հաճախ ցամաք հաց ուտում կամ սոված են մնում:
«Առաջին լրատվական»-ի հետ զրույցում Թեհմինե Պողոսյանը մանրամասնեց, որ մի օր փողոցում հայտնվելու վախով են ապրում, գյուղի բնակիչները դժգոհում են, իրենց երեխաներին ուզում են մանկապարտեզ տանել, իսկ մանկապարտեզի շենքը այդպես էլ չեն վերանորոգում:
«Վերանորոգումը մեզանով պայմանավորված չէ, փող չկա, պիտի ծրագիր լինի, բյուջեով հատկացված փող, որ վերանորոգեն: Մենակ խնդրում ենք այս դեպքում մեզ տանիք տալ, պարտավորվում ենք վճարել ամսական՝ որքանով կկարողանաք»,- նշեց նա:
Թեհմինե Պողոսյանը դաշտում է աշխատում՝ 4-5 հազար դրամ վաստակում. «Հազիվ երկու երեխաների ուտելու փող է լինում, բայց ամենօրյա գործ չէ, օր կա՝ երեխաներիս ճմկտում եմ, ասում եմ՝ սովին դիմացեք»:
Նրա ամուսինը հիմա ՌԴ-ում է, անաշխատունակ է, բարեկամներն են հյուրընկալել: «Ստեղ անասուն էր պահում, ոտքը շարքից դուրս եկավ, հիվանդ է»,-մանրամասնեց նա:
Կինը մեզ պատմեց, որ ամուսնու մայրը մահացել է, հայրը կրկին ամուսնացել է, արդյունքում իր ամուսինը և նրա եղբայրը հայտնվել են փողոցում: 5 տարի է՝ այստեղ են բնակվում. «Ամուսնուս ու եղբորը տնից դուրս էին շպրտել, ամբողջ գյուղը գիտի, ոչ էլ մի կտոր հող ունենք, 6 ամիս նոր նպաստ են տալիս, երկու երեխա ունեմ՝ աղջիկ և տղա, նպաստի փողը լույսի, գազի եմ տալիս»,- ասաց նա:
Նրա որդին չորրորդ դասարան է փոխադրվում, բայց արդեն դաշտերում սմբուկ, ձմերուկ ու ծիրան է հավաքում, շատ չի կարողանում վաստակել, կես գին են վճարում. «Կյանքը ընենց ա դասավորվել, որ պիտի աշխատեմ»,- նշեց նա:
Մանրամասները՝ տեսանյութում
