ԱԺ արտաքին հարաբերությունների մշտական հանձնաժողովի անդամ, ՀՀԿ խմբակցության պատգամավոր Շիրակ Թորոսյանը կարծում է, որ ՀՀ-ում ժողովրդավարության կապակցությամբ միջազգային կառույցների ԱՄՆ-ի արտահայտած գնահատականները շատ դեպքերում օբյեկտիվ են: Բայց պատգամավորը չցանկացավ խոսել այդ գնահատականների բովանդակության մասին:
«Չքննարկելով նրանց գնահատականները ՀՀ-ի վերաբերյալ ճիշտ են, թե սխալ, ուզում եմ մեկ այլ հանգամանքի վրա ուշադրություն դարձնել. Երբ այդ նույն խնդիրների շուրջ այլ երկրների դեպքում նրանք երկակի ստանդարտներով են մոտենում, գնահատականներն արժեզրկվում են»,- նշեց նա: Ըստ Թորոսյանի, նույն խնդիրներն առկա են նաեւ Վրաստանում, սակայն ԱՄՆ-ն դրանց վերաբերյալ աչք է փակում: Նրա խոսքերով, օրինակները շատ են եւ մարդու իրավունքների, եւ խոսքի ազատության, եւ ազգային փոքրամասնությունների իրավունքների ոլորտում: «Հայաստանի դեպքում այդ գնահատականները հնչում են շատ խիստ, շատ հասցեավորված` անթաքույց ցույց տալով ամերիկյան կառավարության տեսակետը:
Մինչդեռ, նրանք Վրաստանի դեպքում այդպես չեն վարվում` չգիտես ինչու: Վրաստանի նկատմամբ գնահատականները շատ փաղաքշական են գնահատականները, վերապահումներով, մեղմ»,- ասաց Թորոսյանը:
