Ամռան տոթ ամիսներին Սևանի ափերը բեռնված են ոչ միայն մայրաքաղաք Երևանից և Հայաստանի այլ մարզերից ժամանած հովեկներով, այլ նաև` օտարերկրյա զբոսաշրջիկներով, որոնց հիմնական մասը գերադասում են Սևանա լճի հրապույրները վայելել Սևան քաղաքի տարածքի լողափերում և Սևանի թերակղզում: Ինչպես «Արմենպրես»-ին տեղեկացրել է Սևան քաղաքի զբոսաշրջային գրասենյակի պատասխանատու Դավիթ Թորոսյանը, օտարերկրյա զբոսաշրջիկների հոսքն առավել ակտիվացել է օգոստոս ամսին:Նրանք գալիս են Իրանից, Ռուսաստանից, Ֆրանսիայից, Իտալիայից, Սլովենիայից, Լեհաստանից, Ռումինիայից:
«Մեր գրասենյակի հետ ունեցած անմիջական շփումների արդյունքով` օրական Սևան քաղաք մուտք են գործում մոտ 30 օտարերկրացի զբոսաշրջիկ: Նրանց մեջ գերակշռող է մնում Իրանի Իսլամական Հանրապետությունից ժամանող քաղաքացիների թիվը: Իրանցիները ժամանում են տուրիստական ավտոբուսներով և գերադասում են հանգիստն անցկացնել Սևանի թերակղզու տարածքի լողափերում: Մոտավոր հաշվարկներով ու կանխատեսումներով` հանգստյան սեզոնի ավարտին Սևան այցելած զբոսաշրջիկների թիվը կմոտենա 120 հազարին: Հայաստանից եկած հովեկների թվի մասին հստակ տեղեկատվություն չենք կարող ներկայացնել, բայց այդ թիվն էլ կարող է տեղավորվել մի քանի հարյուր հազարի մեջ, քանի որ շոգերը հաղթահարելու բացառիկ վայրը մնում է Սևանը»,-նշել է Դավիթ Թորոսյանը:
