28-ամյա Բոժենա Դանիլովիչը տառապում է տարածական կողմնորոշման խախտումով: Նրա դեպքը յուրահատուկ է, քանի որ այդ պատճառով նա գլխապտույտներ չունի, ուղղակի աշխարհը գլխիվայր է տեսնում:
Դա նշանակում է, որ Սերբիայի Ուժիցե քաղաքի քաղաքային խորհրդի աշխատակցուհին փաստաթղթերը, գրքերը և թերթերը գլխիվայր շրջած է կարդում: Աշխատավայրում նրան ընդառաջել են՝ հաշվի առնելով նրա հիվանդության յուրօրինակությունը: Նույնիսկ նրա համակարգչի էկրանն է շրջված: Ստեղնաշարը նույնպես շրջված է այնպես, որ աղջկա ուղեղն այն որպես հայելու արտացոլանք ընկալի, և նա կարողանա որակով կատարել իր աշխատանքը:
Տանը Բոժենան հեռուստացույց միայնակ է դիտում, քանի որ հեռուստացույցը նույնպես գլխիվայր շրջված է: Նրա ծնողները հիշում են, որ երբ աղջիկը սկսել է քայլել, ապա դա արել է հակառակ ուղղությամբ: Նրա մայրը երկարատև արձակուրդ է խնդրել, որպեսզի երեխային սովորեցնի քայլել այնպես, ինչպես բոլորն են քայլում: Հարկ է նշել, որ այս հազվագյուտ առանձնահատկությունը չի խանգարել նրան գերազանց ավարտել քոլեջը:
ԱՄՆ Հարվարդի և Մասաչուսեթսի համալսարանների նյարդաբաններն այս խանգարումը «տարածական կողմնորոշման կամ ընկալման ֆենոմեն» են անվանել: «Նրանք պնդում են, որ իմ աչքերն ամեն ինչ ճիշտ են տեսնում, սակայն ուղեղս ամեն ինչ գլխիվայր է շրջում: Սակայն նրանք չեն կարող բացատրել, թե ինչպես է դա տեղի ունենում, և թե ուղեղի որ մասն է դրա համար պատասխանատու: Փորձագետներն ասում են, որ ճանաչում են մի քանի մարդու, ովքեր գրում են ինձ պես, սակայն նրանք աշխարհն այնպես չեն տեսնոմ, ինչպես ես»,- ասել Բոժենան:
