ԲՀԿ խմբակցության պատգամավոր, «Ալյանս» կուսակցության նախագահ Տիգրան Ուրիխանյանը թեև աչքի է ընկնում ռուսամետությամբ, սակայն ինքն էլ է վրդովվել Ռուսաստանի Ռազմավարական զարգացման ինստիտուտի գլխավոր տնօրեն Անդրանիկ Նիկողոսյանի այն համոզմունքից, որ Հայաստանը, բացարձակ մեծամասնությամբ, կմտնի Ռուսաստանի կազմի մեջ, եթե Ռուսաստանը դեմ չլինի: Նա միացել է անկախ պատգամավոր Էդմոն Մարուքյանի այն պահանջին, որ ԱԺ նախագահ Գալուստ Սահակյանը ՀՀ ԱԺ բարձրագույն պարգև պատվո շքանշանից զրկի Անդրանիկ Նիկողոսյանին` նրա հակապետական հայտարարությունների համար:
«Առաջին լրատվական»-ի հարցին, թե միացե՞լ է Էդմոն Մարուքյանի պահանջին, Ուրիխանյանն ասաց. «Մոտավորապես՝ այո»։ Մեր հարցին, թե ինչ է նշանակում մոտավորապես, պարզաբանեց՝ Մարուքյանը կոչ էր արել գործընկերներին միանալ, ինքն էլ միացել է։
Մեր դիտարկմանը, թե ինքը ակնհայտ ռուսամետ է եղել, ի՞նչն է կոնկրետ այդ հայտարարության մեջ իրեն վրդովեցրել, ասաց. «Կոռեկտ հարցերով դիմեք, այլապես զրույցը կավարտվի»։ Ուրիխանյանը չպատասխանեց հարցի մեջ ոչ կոռեկտը ո՞րն էր՝ իր ռուսամետության մասին շեշտե՞լը, թե՞ այլ բան։
Ի դեպ, Անդրանիկ Նիկողոսյանը մինչև վերջերս եղել է Աժ փոխնախագահ Հերմինե Նաղդալյանի օգնականը՝ հասարակական հիմունքներով։ Մեզ հասած տեղեկություններով՝ այս աղմուկից հետո տիկին Նաղդալյանը լծվել է Նիկողոսյանի հետ իր պաշտոնական առնչության փաստացի ապացույցները ոչնչացնելու գործին։
