Նախկին դատավոր Պարգև Օհանյանը դեմ է երկրում տեղի ունեցող ցանկացած հեղափոխական, ստվերային գործընթացների: Այս մասին նա ասաց «Առաջին լրատվական»-ի հետ զրույցում՝ անդրադառնալով երեկ Ազատության հրապարակում տեղի ունեցած քաղաքացիական քննարկմանը, որի ընթացքում ՀԱԿ պատգամավոր Նիկոլ Փաշինյանն առաջարկել է իր անունը՝ որպես ստվերային կառավարության հնարավոր ներկայացուցիչ:
Պարգև Օհանյանը նշեց՝ զարմացել է, որ իրեն առաջադրել են որպես հավանական թեկնածու, բայց գաղափար չունի՝ ինչի մասին է խոսքը, ինչ խնդիր պետք է լուծի այդ կառավարությունը: Նախկին դատավորը հստակեցրեց, որ այդպիսի գործընթացներին այնքան էլ կողմնակից չէ:
«Շոյված եմ, որ ինձ գնահատել են: Կարող է տարօրինակ հնչել, բայց իմ ձեռքը եթե ճար լինի, ես իշխանություններին կօգնեմ՝ այս վիճակից դուրս գալու համար, եթե, իհարկե, իշխանությունները դրա անհրաժեշտությունն ունենան: Ինչ-որ հեղափոխական, ստվերային գործընթացների ես կողմնակից չեմ:
Նախագահ Սարգսյանն ասել է, որ առողջ քննադատության համար շնորհակալ է, պատրաստ է համագործակցության: Եթե քայլեր լինեն համագործակցության ուղղությամբ, կողմ եմ, որպեսզի օգնենք իշխանություններին՝ գտնելու լուծում ինչ-որ հարցերի, դիմակայելու երկրի առջև ծառացած մարտահրավերներին»,- մեկնաբանեց Պարգև Օհանյանը՝ շարունակելով, որ եթե դա արվում է, որպեսզի սասանենք պետության հիմքերը, իշխանությանը ոչ լեգիտիմ հայտարարենք, դեմ է: Նա նշեց՝ եթե այդ կառավարությանը մաս կազմելու առաջարկ լինի, ապա բարեհամբույր կերպով կմերժի այն:
Հիշեցնենք, որ նախագահական ընտրությունների արդյունքները վիճարկող «Ժառանգություն» կուսակցության առաջնորդ Րաֆֆի Հովհաննիսյանի աջակիցները երեկ Ազատության հրապարակում հանրային քննարկում անցկացրին ստվերային կառավարության ձևավորման վերաբերյալ: Հանրային քննարկման բանախոսներից Ազգային ժողովի ՀԱԿ խմբակցության պատգամավոր Նիկոլ Փաշինյանը ներկայացրեց որոշ անուններ, որոնք, իր կարծիքով, կարող են լինել նոր ստվերային կառավարության կազմում: Ցանկում ընդգրկված էին մի քանի տասնյակ գործիչների անուններ, այդ թվում՝ նախկին դատավոր Պարգև Օհանյանի անունը:
