Դատավորների ընդհանուր ժողովի էթիկայի և կարգապահական հարցերի հանձնաժողովը մերժել է Մարդու իրավունքների պաշտպան Կարեն Անդրեասյանի դիմումը, որով վերջինս պահանջել էր վարույթ հարուցել Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Մնացական Մարտիրոսյանի (Մացո) նկատմամբ: Այս մասին ասել է ինքը՝ Մնացական Մարտիրոսյանը, թեև Օմբուդսմենի գրասենյակից դեռևս չեն հաստատում՝ պատճառաբանելով, որ իրենք դեռ գրավոր պատասխան չեն ստացել դատական դեպարտամենտից:
Հիշեցնենք. Օմբուդսմենը դատապարտյալ Արթուր Այվազյանին առնչվող մի գործի ուսումնասիրմամբ պարզել էր, որ Մարտիրոսյանը դուրս է եկել օրենքով իրեն վերապահված լիազորությունների շրջանակից և թույլ է տվել ՀՀ քրեական դատավարության օրենսգրքի 7-րդ հոդվածի 1-ին մասի, 429-րդ հոդվածի 1-ին մասի, 358-րդ հոդվածի դրույթների ակնհայտ և կոպիտ խախտում, ինչի հետևանքով խախտվել են նաև Սահմանադրության 5-րդ, 18-րդ և 19-րդ հոդվածներով սահմանված դրույթները:
Բացի այդ, Օմբուդսմենը կարծում է, որ դատապարտյալի պաշտպանի բողոքի մերժման որոշումը պատշաճ պատճառաբանված չի եղել:
«Այսպիսով, հիմք ընդունելով վերոգրյալը՝ գտնում ենք, որ Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Մնացական Մարտիրոսյանը թույլ է տվել դատավարական նորմերի ակնհայտ և կոպիտ խախտում, ինչը ՀՀ դատական օրենսգրքի 153-րդ հոդվածի 2-րդ մասի, 2-րդ կետին համապատասխան՝ հիմք է հանդիսանում դատավորին կարգապահական պատասխանատվության ենթարկելու համար»,- դատավորների ընդհանուր ժողովի կարգապահական հանձնաժողովին ուղարկված դիմումում գրել էր Օմբուդսմենը:
Սակայն հանձնաժողովը մերժել է դիմումը՝ համարելով, որ վարույթի հարուցման հիմքեր չկան:
Ուշագրավ է, որ Մնացական Մարտիրոսյանը հանդիսանում է հենց նույն հանձնաժողովի անդամ, և ենթադրվում էր, որ դժվար թե այդ հանձնաժողովը նրան կարգապահական պատասխանատվության ենթարկեր՝ անկախ այն հանգամանքից, որ Օմբուդսմենը հստակ նշել էր հիմքերը:
Եվ հետո՝ հիշյալ դատավորը համակարգում հայտնի է որպես քաղաքական հնչեղ գործերով իշխանության պատվերներ կատարող, ավելի կոնկրետ՝ քաղաքական պատվերների դատավոր: Նա հանրությանն ավելի հայտնի դարձավ մարտի 1-ից հետո «7»-ի գործի քննությամբ ու ակնհայտ պատվեր համարվող դատավճիռների հրապարակմամբ: Դրանից հետո նա քննում էր մարտի 1-ից հետո շուրջ 1 տարի ընդհատակում գտնվող Նիկոլ Փաշինյանի, ապա նաև ՀԱԿ ակտիվիստների գործը՝ բոլոր գործերով արձակելով մեղադրական դատավճիռներ:
Վերը նշված մի շարք գործերով որպես փաստաբան հանդես եկած Լուսինե Սահակյանը ևս «Առաջին լրատվական»-ի հետ զրույցում նշեց, որ նախ՝ այդ հանձնաժողովը չէր կարող օբյեկտիվ քննել այդ վարույթը, քանի որ Մարտիրոսյանը հենց այդ հանձնաժողովի անդամ է. «Եվ հետո՝ նկատի ունենալով Մնացական Մարտիրոսյանի անձը, որ քաղաքական բազմաթիվ դատավարություններում հենց նա է հանդես գալիս որպես նախագահող դատավոր, կարծում եմ՝ օբյեկտիվ երբեք չեն կարող լինել Մնացական Մարտիրոսյանի հետ կապված հարցերում»:
