ԱՄՆ Միսիսիպի նահանգում դատարանն ահաբեկիչներին աջակցելու մեղադրանք է առաջադրել ամուսնական զույգին, որը ծրագրել է մեղրամիսն անցկացնել Սիրիայում և միանալ ԴԱԻՇ-ի գրոհայիններին: Այս մասին հայտնում է CNN հեռուստաալիքը:
20-ամյա Ջեյլին Դելշոն Յանգին և 22-ամյա Մուհամմադ Օդա Դախլալլային ձերբակալել են Կոլոմբուս քաղաքի օդանավակայանում: Զույգը չի հերքել, որ մտադիր է եղել մեկնել Թուրքիա, հետո միանալ իսլամիստներին:
Նորապսակներին ՀԴԲ-ի աշխատակիցներն են բացահայտել: Մի քանի ամիս նրանք սոցցանցերում շփվել են զույգի հետ՝ ներկայանալով որպես ԴԱԻՇ-ի ներկայացուցիչ:
Հեռուստաալիքի հաղորդմամբ՝ երիտասարդները նաև հայտնել են, որ պատրաստ են գրոհայիններին նյութական օգնություն տրամադրել:
Վերջերս իսլամ ընդունած աղջիկը ոստիկանի դուստր է, երիտասարդը՝ տեղացի իմամի որդի:
