Հուլիսին արքայազն Ուիլյամը և դքսուհի Քեյթը ծնողներ կդառնան: Այդ ուրախալի իրադարձության նախաշեմին ամուսինները հաջողությամբ ավարտում են թագավորական Anmer Hall առանձնատան վերանորոգման աշխատանքները (բանվորների օգնությամբ, իհարկե)։ Նրանք պատրաստվում են այստեղ ապրել և մեծացնել իրենց երեխային: The Daily Mail բրիտանական հրատարակչությանը հայտնի է դարձել «Միդլթոնի գաղտնի պլանի» մանրամասները:
Հիշեցնենք, որ Anmer Hall-ը գտնվում է Եղիսաբեթ թագուհու Sandringham House առանձնատնից ոչ հեռու: Ամուսիններին չի վախեցրել տան վատ համբավը, որտեղ արքայազն Չարլզը դեռ արքայադուստր Դիանայի օրոք գաղտնի հանդիպում էր Քամիլա Պարկեր-Բոուլզի հետ:
Միդլթոնը, մանրամասն զննելով առանձնատունը և խորհրդակցելով ամուսնու հետ, շենքի վերանորոգման աշխատանքներով զբաղվող թագավորական պաշտոնյաներին հանձնարարականներ է տվել: «Տասը սենյակ, լողավազան և թենիսի դաշտ ունեցող այս առանձնատունը շրջապատված է 200 000 ակր հողատարածքով, որը պետք է զույգի իսկական թաքստոցը դառնա: Առանձնատան շուրջը հարյուրավոր թփեր և ծառեր կտնկվեն, որպեսզի ընտանիքին պաշտպանեն հետաքրքրասեր աչքերից: Դրանից բացի, այնտեղ գաղտնի ճանապարհ կկառուցեն»,- գրում է The Daily Mail-ը:
Քեյթը ցանկացել է նաև, որպեսզի տան շուրջը նոր այգի և ծաղկանոց լինի: Դքսի և դքսուհու անվտանգությունը շուրջօրյա կապահովեն ոստիկանները (նրանց համար առանձին տուն կկառուցվի):
Ծրագրված է նաև դարպասները հեռացնել տան գլխավոր մուտքից, որպեսզի ոչ ոք չկարողանա մոտենալ առանձնատանը, շինություն տանող նոր ճանապարհը կանցնի Anmer Hall-ը շրջապատող արոտավայրերով, ձմեռային այգին կկառուցվի խոհանոցի և ամառային տնակի հարևանությամբ, որպեսզի շոգ օրերին ստվերն ապահովված լինի:
Թե ինչ կարժենան այս նորամուծությունները բրիտանական բյուջեին, դեռ չի տեղեկացվում:
