Նորածինների և երեխաների մեկ երրորդը չափազանց շատ կալորիաներ է ընդունում: Փորձագետները նախազգուշացնում են, որ այդ երեխաներին ավելի մեծ տարիքում ճարպակալում է սպառնում: Երեխային անհրաժեշտ կալորիաների քանակը փոփոխվում է՝ կախված նրա տարիքից, աճի արագությունից և ակտիվությունից: Որպես կանոն՝ վեց ամսական երեխային օրական 600 կալորիա է անհրաժեշտ, իսկ 6-12 ամսականներին՝ 750:
Սակայն Մեծ Բրիտանիայի Առողջապահության նախարարության անցկացրած ուսումնասիրությունների արդյունքների համաձայն՝ երեխաներն օրական սահմանված չափից 100 կալորիա ավել են ստանում: Այս խնդիրը մասամբ պայմանավորված է նրանով, որ մայրերն իրենց երեխաներին շատ կալորիաներ պարունակող սնունդ են տալիս: Դրանից բացի, շատ երեխաներ արհեստական սնունդ են ստանում, որը ավելի շատ կալորիաներ է պարունակում, քան կրծքի կաթը:
Որոշ ժամանակ անց երեխաներն ավելի շատ սնունդ են պահանջում, և նրանց կալորիաներով հարուստ ուտելիք են տալիս: Դրանից բացի, փոքրիկները էլ չեն ուտում, երբ կշտանում են, իսկ մայրերը ստիպում են ուտել շշի ամբողջ պարունակությունը: Սովորաբար արհեստական կեր ուտող երեխաները 500 գրամով ավելի ծանր են լինում կրծքով կերակրվողներից:
