Պատանի պարողների «Եվրատեսիլ»-ին այս տարի Հայաստանը ևս կունենա իր մասնակիցը: Պրոֆեսիոնալ ժյուրիի որոշման արդյունքում Հայաստանը հունիսի 14-ին Լեհաստանի Գդանսկ քաղաքում կներկայացնի 17-ամյա Վահագն Մարգարյանը:
«Առաջին լրատվական»-ի հետ զրույցում «Եվրատեսիլ»-ի հայաստանյան պատվիրակության ղեկավար Գոհար Գասպարյանն ասաց, որ ցանկացած «Եվրատեսիլ»-ի հարցում Հայաստանը եղել է ակտիվ, և քանի որ անցյալ տարի պատանի երաժիշտների «Եվրատեսիլ»-ին Հայաստանը զբաղեցրեց երրորդ հորիզոնականը, դա խթան դարձավ մասնակցելու նաև պատանի պարողների «Եվրատեսիլ»-ին:
«Քանի որ եվրատեսիլային մրցույթները Հայաստանում շատ տարածված են, մենք որոշել ենք մեր պարողներին էլ հնարավորություն տալ իրենց ուժերը փորձելու միջազգային հարթակի վրա: Շատ խիստ էին մրցույթի կանոնները, պարողները պետք է անպայման բալետի կրթություն ունենային: Պրոֆեսիոնալ ժյուրին հարմար գտավ, որ Հայաստանը ներկայացնի Վահագնը»,- տեղեկացրեց Գոհար Գասպարյանը:
Նշենք, որ Վահագնը Էջմիածնից է, սովորում է Երևանի պարարվեստի պետական քոլեջի բալետի բաժնում: Նա պարել սկսել է 12 տարեկանից:
Ինչ վերաբերում է պարի ընտրությանը, ապա Գոհար Գասպարյանն ասաց, որ դա պարզ կլինի արդեն ապրիլ ամսին:
