Չնայած երկրում շինարարության ոլորտի ճգնաժամին՝ կառավարության նիստերի դահլիճում վարչապետ Հովիկ Աբրահամյանը հանդիսավոր նշում էր Շինարարի օրը։ Պարգևատրվեցին շինարարական կազմակերպությունների ղեկավարներ։ Միջոցառման մասնակիցների թվում էր ԲՀԿ խմբակցության պատգամավոր Արագած Ախոյանը, ով շինարարության ոլորտում գործունեություն է ծավալում երկար տարիներ։
«Առաջին լրատվական»-ի հետ զրույցում պատգամավորն ասաց, որ ոլորտում տխուր վիճակ է՝ ընդգծելով, որ այն պայմանավորված է նաև բանկային համակարգի խնդիրներով։
«Տարիներ առաջ շինարարությունը հռչակվեց ռիսկային գոտի, բանկերն էլ վերածվեցին այն տեսակին, որ շոգ ժամանակ անձրևանոց են առաջարկում, բայց անձրև եղանակին այն հետ են վերցնում։ Նման են մարդկային այն կերպարին, որ հայտնվում են այն մարդու կողքը, ում գրպանում փող կա, հենց գումարը պակասում է՝ հայտնվում են այլ մարդու կողքին։ Բանկն էլ իր հերթին պիտի հասկանա, որ վարկառուն իր ճորտը չի, ընդամենը գործընկեր է, և այդ հոգեբանությամբ տնտեսությանը ավելի օգուտ կտան»,- դժգոհեց պատգամավորը։
Վարչապետի գործունեությանը գովեստի խոսքեր շռայլող պատգամավորին հարցրինք՝ արդյոք իր նշած խնդիրները կարգավորելու հարցում վարչապետն անելիք չունի՞։
«Ունի, դեռ մեկ տարի է, կանցնեն տարիներ, և ամեն ինչ կընկնի իր տեղը»,-հույս հայտնեց Արագած Ախոյանը։
«Երկրի տնտեսության զարգացումը արտահայտվում է շինարարության տեսքով։ Որ երկրի վիճակը ուզում եք տեսնեք՝ նայեք շինարարությանը. եթե կա շինարարություն, ուրեմն տնտեսության վիճակը լավ է, եթե չկա, ուրեմն երկրի տնտեսական վիճակը բացարձակ անհուսալի է»,- նշեց Արագած Ախոյանը։
