Վրացական Newsgeorgia.ru կայքի փոխանցմամբ, այսօր Վրաստանի խորհրդարանը միաձայն (84 կողմ) ընդունել է 2006 թվականի մարտի 31-ին Ռուսաստանի հետ կնքած Վրաստանի տարածքով ռազմական բեռների ու անձնակազմի փոխադրման մասին պայմանագրի կասեցման որոշումը:
Մեկնաբանելով այդ որոշումը` Վրաստանի փոխարտգործնախարար Նինո Քալանդաձեն հայտարարել է, որ Ռուսաստանի կողմից ագրեսիա ձեռնարկելուց հետո վրացական կառավարությունը որոշել է այլևս չերկարաձգել այդ պայմանագիրը.
«Այդպիսի իրավիճակում անարդարացի է ռազմական բեռների փոխադրման հարցում Ռուսաստանին տարանցիկ հնարավորություններ ընձեռելը: Ընդ որում, դա վերաբերում է թե ցամաքային, թե օդային ճանապարհին: Այդ համաձայնագրի ժամկետի ավարտից կես տարի առաջ մեր նախագահը հանդես եկավ այն չեղյալ հայտարարելու նախաձեռնությամբ:
Մենք նախապես Ռուսաստանին տեղյակ կպահենք, որ դուրս ենք գալիս այդ համաձայնագրից: Վերջին անգամ Ռուսաստանն այդ համաձայնագրի երկարաձգման հարցով Վրաստանին դիմել է 2008 թվականի հունիսին, սակայն, մերժում ստանալով, այլևս նման փորձ չի ձեռնարկել»:
Հիշեցնենք, որ օրեր առաջ Հայաստանի խորհրդարանը 80 կողմ, 1 դեմ և 1 ձեռնպահ ձայներով վավերացրեց երկրի տարածքում ռուսական ռազմաբազայի տեղակայման ժամկետների երկարաձգման (25-ից 49 տարի) մասին արձանագրությունը։