Գործընկերային հարաբերությունների զարգացմանն ու ընդլայնմանն առնչվող մի շարք հարցեր են քննարկվել Երևանի քաղաքապետ Կարեն Կարապետյանի Մոսկվայի կառավարության պատվիրակության հետ տեղի ունեցած հանդիպման ժամանակ։ «Վստահ եմ, որ պատմականորեն ձևավորված մեր բարեկամական հարաբերությունները ավելի պրագմատիկ և գործնական պետք է լինեն»,– նշել է պատվիրակության ղեկավար, Մոսկվայի արտաքին տնտեսական և միջազգային կապերի դեպարտամենտի ղեկավար, Մոսկվայի կառավարության նախարար Եվգենի Չերյոմինը։
Երևանի քաղաքապետին ներկայացնելով ՌԴ մայրաքաղաքի կառավարման ոլորտում առկա փոփոխությունները՝ պատվիրակության ղեկավարն առանձնացրել է Մոսկվայի համար առաջնային լուծում պահանջող գերակա ուղղությունները։ Նրա խոսքով, ինչպես բոլոր խոշոր քաղաքների, Մոսկվայի համար էլ այսօր առաջնային են սոցիալական, տրանսպորտային և այլ հիմնախնդիրներ։
Հյուրերին ներկայացնելով մայրաքաղաքի կառավարման ոլորտում իրականացվող ծրագրերը՝ Երևանի քաղաքապետը նշել է նաև, որ ներդրումային առումով քաղաքապետարանի քաղաքականությունը բաց և բարենպաստ միջավայր ապահովելն է։
Հանդիպման ընթացքում քննարկվել են երկկողմ հետաքրքրություն ներկայացնող մի շարք ուղղություններ՝ կարևորելով փորձի փոխանակման և գործնական շփումների անհրաժեշտությունը։ Մոսկովյան պատվիրակության ղեկավարը նշել է, որ քաղաքաշինական և ենթակառուցվածքային ծրագրերում ակնկալում են հայ ճարտարապետական և նախագծային ինստիտուտների ծառայությունները։