Ապրիլի 6-ին` ժամը 19:00-ին, Կարեն Դեմիրճյանի անվան մարզահամերգային համալիրի մեծ դահլիճում երգչուհի Սիրուշոն և Dorians ռոք խումբը հանդես կգան համատեղ համերգով: Այս մասին «Առաջին լրատվական»-ը տեղեկանում է Deem Communications ընկերության մամլո ծառայությունից:
Մեկ բեմում հանդես գալու նախաձեռնությամբ Սիրուշոն և Dorians-ն առաջին անգամ են միասին ներկայանում իրենց երկրպագուներին և հանրությանը:
«Միասին մեկ բեմում» համերգային ծրագրում համադրվելու են ռոք և փոփ ոճերի, ինչպես նաև ազգային մեղեդիների ռիթմերը: Համերգն ուղեկցվելու է պարային և լուսային շոու ծրագրով: Սիրուշոն ու Dorians-ն այս համերգով Հայաստանի երաժշտասերներին ոճերի համադրությամբ նոր մոտեցում կերկայացնեն:
Սիրուշոն բազմաթիվ ալբոմների հեղինակ է, ելույթ է ունեցել հայաստանյան և միջազգային բեմերում: Նա համերգին կներկայացնի ինչպես իր հին ու սիրված, այնպես էլ նոր ստեղծագործությունները:
2008 թվականին Հայաստանում ստեղծված Dorians ռոք խումբը մի քանի տարում կարողացել է մեծ ճանաչում ձեռք բերել:
Համերգի նախապատրաստման մասին YouTube-ում մարտի 6-ին տեղադրված տեսահոլովակը 5 օրում արձանագրել է ավելի քան 19 000 դիտում:
Համերգի տոմսերը վաճառքում կլինեն մարտի 20-ից:
