Ռուսական Interfax լրատվական գործակալության փոխանցմամբ՝ Թբիլիսիի Վերաքննիչ դատարանն ուժի մեջ է թողել Վրաստանի նախկին վարչապետ Վանո (Իվանե) Մերաբիշվիլիի գործով դատավճիռը՝ կապված 2006 թվականին ՆԳՆ-ի աշխատակիցների կողմից բանկի աշխատակից Սանդրո Գիրգվլիանիի սպանության հետ։
Այդ մասին նշված է Վրաստանի գլխավոր դատախազության տարածած հայտարարությունում։ Դատավճիռը նույնն է մնացել նաև Սահմանադրական անվտանգության դեպարտամենտի երկու նախկին բարձրաստիճան պաշտոնյաների՝ Գերոնտիա Ալանիայի ու Վալերիան Մետրևելիի նկատմամբ։
2014 թվականի հոկտեմբերին Թբիլիսիի քաղաքային դատարանը Մերաբիշվիլիին մեղավոր ճանաչեց իր ծառայողական լիազորությունները չարաշահելու համար և նրան դատապարտեց մինչև 3 տարվա ազատազրկման, ինչպես նաև արգելեց 2 տարի 3 ամիս ժամկետով զբաղեցնել պետական պաշտոններ։
Դատախազության պնդմամբ՝ դատական արդեն երկու ատյաններ հաստատել են, որ Մերաբիշվիլին, հանդիսանալով Վրաստանի ներքին գործերի նախարարը, կազմակերպել է Գիրգվլիանիի սպանության գործի հանցանշանների կեղծում և քողարկել է այդ հանցագործությանը Սահմանադրական անվտանգության դեպարտամենտի նախկին ղեկավար Դավիթ Ախալայայի մասնակցությունը։