Այսօր Ազատության հրապարակում «Ժառանգություն» կուսակցության անդամ Ստյոպա Սաֆարյանը հրապարակեց ՄԻՊ հայտարարությունը, որով դատապարվում է Րաֆֆի Հովհաննիսյանի համար վրանի տեղադրումն արգելելը և ոստիկանների պահվածքը անիրավաչափ է համարվում:
«Ես երբևէ պահանջ չեմ ներկայացրել վրանի տեղադրման համար, դա առաջին հերթին պետական մարմինների պարտավորությունն է»,- հայտարարեց ՀՀ նախագահի նախկին թեկնածու Րաֆֆի Հովհաննիսյանը՝ ողջունելով այն քաղաքացիների սրտացավ մոտեցումը, որ 5-րդ օրը ուզեցին ծածկ ապահովել իր գլխավերևում, նաև ոստիկանությանը ամոթանք տվեց, որ հենց իրենք վրան չտեղադրեցին:
Ր. Հովհաննիսյանի գնահատականով՝ ոստիկանների պահվածքն անընդունելի ու իրավաչափ չէր քաղաքացիների նկատմամբ. «Այս ամիսների ընթացքում մեր պայքարը ոստիկանության հետ եղել էր համերաշխ պայքար: Եվ ես երբեք թույլ չեմ տալու, որ բախում լինի: Երբ Վովա Գասպարյանի խիղճը տանջի, թող ինքը հրահանգի, որ ոստիկանները վրան տեղադրեն»:
Ր. Հովհաննիսյանը տեղեկացրեց, որ արվեստագետ, ազգային գործիչ, մշակութային ռահվիրա Վարդան Պետրոսյանին, որ վերադարձավ Ֆրանսիայից՝ շարժմանը միանալու համար, արգելել են մուտք գործել Ֆրանսիական համալսարան՝ ուսանողների հետ հանդիպման. «Կուսականացրել են կրթական համակարգը, բայց ապրիլի 9-ից հետո փոխվելու է: Ես թույլ չեմ տալու, որ մեր հաղթանակը չտոնենք միասին»:
Ր. Հովհաննիսյանը նշեց, որ այսօր բազմաթիվ մտավորկաններ, ազատամարտիկներ այցելել են իրեն՝ Լևոն Խեչոյանը, Աշոտ Ադամյանը, «Արաբո» ջոկատի հրամանատար Մանվել Եղիազարյանը և այլն: Ըստ նրա՝ բոլոր կուսակցությունները պետք է սպասարկեն մեր, ժողովրդի շահը:
«Մեկնաբանելու եմ միայն մեկ մարդու խոսքը՝ Սերժ Սարգսյանի: Փետրվարի 18-ից հետո քաղաքական մանրակերտը փոխվել է, հաղթել է քաղաքացին, և կուսակցական խաղերը երկրորդական են»,- ասաց Ր. Հովհաննիսյանը ու, ներկայացնելով Ս.Սարգսյանի հետ իր առաջին հանդիպումը, հավելեց. «Եթե Սերժ Սարգսյանը կգա և կներկայացնի իր առաջարկները, ես հարգանքով կլսեմ ու ձեզ հետ միասին կորոշեմ ընդունել, թե չընդունել: Իսկ հիմա մենք գնում ենք նոր Հայաստան, որ երդմնակալությունը կլինի ապրիլի 9-ին: Կա՛մ ինքնաբացարկ, կա՛մ նոր ընտրություն, այլապես ժողվուրդը կորոշի իր անելիքը»,- հայտարարեց Ր.Հովհաննիսյանը:
Նա հավելեց, որ վաղը ասուլիս չի լինի, որովհետև հաղթահավաք է լինելու, ելույթ կունենան պայքարի մասնակիցները, շաբաթ օրը ժամը 17:00-ին կլինի հավաք-համերգ հայկական ռոքի փառատոն՝ «Ոստան հայոց» և «Որդան կարմիր» համույթների մասնակցությամբ, նաև կխոսեն Երևանի ավագանու ընտրություններին մասնակցության ու ապագա ծրագրերի մասին:
