«Քաղաքապետը՝ չգիտեմ, բայց քաղաքապետարանն աշխատում է, և դա ես տեսնում եմ հետազոտության արդյունքներով: Չեմ կարծում, որ կա քաղաք, որտեղ բոլորը գոհ են քաղաքապետարանի աշխատանքից, բայց Երևանում 60% գոհ քաղաքացիների առկայությունը նորմալ ցուցանիշ է»,- այսօր ասուլիսի ժամանակ հայտարարեց «Գելափ ինթերնեյշընլ» ասոցիացիայի նախագահԱրամ Նավասարդյանը՝ ներկայացնելով «Երևանցիները՝ Երևանի մասին» հետազոտության արդյունքները:
Հետազոտության առաջին փուլն անցկացվել էր մոտ 1.5 տարի առաջ, երկրորդ փուլի ժամանակ՝ մարտի 9-11-ը, հարցման է ենթարկվել 1066 մարդ:
Ըստ հարցման արդյունքների՝ վերջին 1.5 տարում դրական փոփոխություններ են արձանագրվել կանաչապատ տարածքների ավելացման, նստարանների տեղադրման, քաղաքի արտաքին տեսքի բարելավման, մաքրության ու շենքերի լվացման առումով:
Ներկա պահին Երևանի առջև կանգնած գլխավոր խնդիրը հարցվողները համարել են գործազրկությունը (51%), գնաճն ու ինֆլյացիան (37%), կոռուպցիան (19%), կրթական վատ համակարգը (13%), արտագաղթը (12%), բարձր հարկերը (10%):
Քաղաքի հիմնական խնդիրները հարցվողները համարել են առողջապահության ոլորտը (24%), կրթական ոլորտը (22%), տրանսպորտի վիճակի բարելավումը (18%), զբաղվածությունը (16%):
Ա. Նավասարդյանը հայտնեց, որ հարցվողները գնահատել են վարչական շրջանները, և Կենտրոն ու Ավան համայնքները ստացել են ամենաբարձր միավորները, իսկ Դավիթաշենում նվազում է նկատվել: Երևանի կահավորման բաղադրիչներից կարևորել են նստարանները, այգիները, ցայտաղբյուրները, թատրոնները և կինոթատրոնները, հասարակական զուգարանները:
«Ճարտարապետական տեսքի առումով ամենաբարձր գնահատական ստացել են Կենտրոնը և Ավանը, ամենացածրը՝ Շենգավիթ և Նուբարաշեն վարչական շրջանները»,- ասաց Ա. Նավասարդյանը՝ հավելելով, որ այս փուլում ավագանու ընտրությունների վերաբերյալ հարցեր չեն եղել, բայց մարտի 21-ից հետո կգնահատեն քարոզարշավի ընթացքը, ավագանու անդամների հետ կապված հարցեր ևս կլինեն:
Լուսանկարը՝ PanARMENIAN Photo-ի
