2013 թ. հուլիսի 1-ից փակվելու է Google Reader-ի RSS-հոսք ընթեցիչը: Այս մասին հաղորդվում է Google-ի պաշտոնական կայքում:
Կորպորացիան մեկնաբանում է, որ վերջին տարիներին համակարգի կիրառման ակտիվությունը նվազել է: Օգտատերերն իրենց տվյալները կարող են դուս բերել հատուկ ծառայության միջոցով:
Google Reader-ի փակման մասին հայտարարվել է հերթական «գարնանային մաքրության» ընթացքում, որը Google-ն իրկանացնում է մի քանի ամիսը մեկ: Բացի RSS-ից, ընկերությունը մոտակա ամիսներին կփակի ևս յոթ ծառայություն:
Մասնավորապես, հունիսի 1-ին ջնջվելու է Google Building Maker հավելվածը, որը թույլ է տալիս ստեղծել շինությունների 3D մոդելները Google Maps-ի և Google Earth-ի քարտեզագրման ծառայությունների համար: Մարտին կորպորացիան կդադարեցնի աջակցել Google Voice հավելվածին:
Ապրիլին դադարեցվելու է Google Cloud Connect հավելվածի աշխատանքը, որը օգտատերերին թույլ է տալիս Microsoft Office օֆիսային փաթեթի փաստաթղթերը պահել «ամպ»-ի մեջ: Ընկերությունն առաջարկում է դրա փոխարեն կիրառել Google Drive: Մնացած երեք ծառայությունները, որոնք կփակվեն մինչև սեպտեմբերի 16-ը, նախատեսված են մշակողների համար:
Նշենք, որ Google Reader-ը թողարկվել է 2005 թ.: Համակարգը թույլ է տալիս մեկ հոսքի մեջ հավաքել տարբեր կայքերի և բլոգների նորությունները:
