Mercedes-Benz-ը ձեռք կբերի Թավրիզում գտնվող իրանական Diesel Engine Manufacturing’s (IDEM՝ դիզելային շարժիչների արտադրող) ընկերության բաժնետոմսերի 30 տոկոսը։ Այս մասին Trend-ի հետ հարցազրույցում ասել է Iran Khodro Industrial Group-ի գլխավոր տնօրեն Հաշեմ Յեկե Զարեն։
Նա հայտնել է, որ Իրանն ու Mercedes-Benz-ը նաև կստորագրեն համաձայնագիր 10 տարի ժամկետով՝ ուղղված Իրանում բեռնատար մեքենաների ու ավտոբուսների արտադրությանը։
Մինչ Արևմուտքի կողմից պատժամիջոցների սահմանումը՝ Mercedes-Benz-ը եղել է Իրանի հիմնական գործընկերը, և զարմանալի չէ, որ ընկերությունը մտադիր է առաջիկա 2-3 ամսում իր գրասենյակը բացել Թեհրանում։
Նա նաև հայտնել է, որ ընկերությունը մտադիր է ձեռք բերել Setar-Iran մեքենա արտադրողի բաժնետոմսերի 50 տոկոսը և ստոագրել 5-ամյա համաձայնագիր՝ սեդանների արտադրության վերաբերյալ։
«Գերմանական ավտոմոբիլային Volkswagen կոնցեռնը նույնպես կարող է դառնալ Իրանի հուսալի գործընկերը»,- ասել է Յեկե Զարեն։
Նրա խոսքով՝ առաջիկա 3-4 ամսում Iran Khodro-ն կարող է նաև պայմանագիր ստորագրել գերմանական Daimler AG-ի հետ՝ լյուքս դասի թեթև ավտոմեքենաների արտադրության համար։
Նա նշել է, որ բացի այդ, ֆրանսիական Peugeot-ը մտադիր է Իրանի հետ մեքենաների արտադրության համատեղ ձեռնարկություն հիմնել։ Իրանական շուկա վերադարձին իրենց համաձայնությունն են տվել նաև ֆրանսիական Renault-ը և ճապոնական Suzuki-ն։
Նրա խոսքով՝ Իրանում մեքենաների արտադրությունը կարժենա 30 տոկոսով ավելի էժան, քան արտերկրում։ Իրանը տարածաշրջանում մեքենաների խոշորագույն արտադրողներից մեկն է։
