«Միսս Իսրայել» տիտղոսին արժանացած աղջիկը՝ Յոետաշի Էյնաուն, սևամորթ է: Նրան Բարաք Օբամայի աշխատակազմը ընթրիքի է հրավիրել նախագահի անունից՝ գրում է իսրայելական The Jerusalem Post պարբերականը:
Ընթրիքը տեղի կունենա երկրի նախագահ Շիմոն Պերեսի նստավայրում:
Իսրայելի բանակի 21-ամյա սպա, Եթովպիայում ծնված Էյնաուն առաջին սևամորթ աղջիկն է, որը արժանացել է «Միսս Իսրայել» տիտղոսին:
«Կարևոր էր, որ ինչ-որ մեկը եթովպիական համայնքից առաջին անգամ հաղթեր այս մրցույթում»,- ասել է աղջիկն իսրայելական ԶԼՄ-ներին:
Հաղորդվում է, որ Յոետաշին Իսրայել է տեղափոխվել 12 տարեկանում՝ իր բազմանդամ ընտանիքի հետ: Աղջիկն աշխատել է հագուստի խանութում՝ որպես վաճառողուհի, ծառայել է բանակում, ունի կրտսեր լեյտենանտի կոչում:
Մրցույթի ժամանակ աղջիկը ակտիվ մեջբերումներ է կատարել ԱՄՆ-ի քաղաքացիական իրավունքի ազատամարտիկ Մարտին Լյութեր Քինգից ու նրան անվանել իր կուռքերից մեկը: «Նա պայքարել է հանուն արդարության ու իրավահավասարության, և դրա շնորհիվ է, որ ես այստեղ եմ գտնվում»,- ասել է նա:
