Թուրքական Haberler.com լրատվական կայքի փոխանցմամբ՝ Թուրքիայում կարող են փակել քրդամետ «Ժողովուրդների դեմոկրատական» կուսակցությունը (ԺԴԿ)։ ԺԴԿ-ի նկատմամբ տարվում է հետաքննություն։ Կուսակցությանը կասկածում են ահաբեկչությանը (PKK-ին) «աջակցելու» մեջ:
Էրդողանը ԺԴԿ-ն անվանել է «PKK-ի քաղաքական թև»։ Նա հայտարարել էր, որ ներկայիս պայմաններում անհնար է շարունակել («Քրդական հարցի») կարգավորման գործընթացը։ Թուրքիայի նախագահն ընդգծել էր, որ կուսակցություն փակելը լավ բան չէ, սակայն ԺԴԿ-ի ղեկավարները պետք է պատասխան տան իրենց արարքների համար։ Էրդողանը կարևորել էր ԺԴԿ-ի պատգամավորներին անձեռնմխելիությունից զրկելը։
Հիշեցնենք, որ ԺԴԿ համանախագահ Սելահաթթին Դեմիրթաշը երեկ հայտարարել էր, որ դիմելու են խորհրդարանին՝ բոլոր պատգամավորների անձեռնմխելիությունը վերացնելու պահանջով։ Դեմիրթաշն ընդգծել էր, որ իրենք մեղք չեն գործել, և իրենց միակ «մեղքն» այն է, որ հունիսի 7-ի խորհրդարանական ընտրությունների արդյունքներով հավաքել են քվեների 13 տոկոսը։
