ՀՀ ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին հայտնում են, որ ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովը մարտի 13-ի նիստում Արտակ Դավթյանի նախագահությամբ քննարկել է «Գիտական և գիտատեխնիկական փորձաքննության մասին» ՀՀ օրենքի նախագծի վերաբերյալ խորհրդարանական լսումներ անցկացնելու հարցը: Ինչպես նշել է Արտակ Դավթյանը, օրինագիծն անցել է բավական երկար քննարկումների ճանապարհ, եղել են իրարամերժ տեսակետներ, որոշ հարցերի պատասխաններ դեռևս տրված չեն: Նրա տեղեկացմամբ՝ խորհրդարանական լսումներին հրավիրված են ոչ միայն ոլորտի ներկայացուցիչներ, այլև սոցիալական ցանցերում հարցով շահագրգռված խմբի անդամներ:
Հանձնաժողովը քվեարկության արդյունքում որոշել է մարտի 28-ին՝ ժամը 11:00-ին, ԱԺ 334 սրահում անցկացնել խորհրդարանական լսումներ «Գիտական և գիտատեխնիկական փորձաքննության մասին» ՀՀ օրենքի նախագծի վերաբերյալ:
