Ադրբեջանական Turan լրատվական գործակալության փոխանցմամբ՝ չնայած նրան, որ Համաշխարհային բանկը մեկ շաբաթ առաջ հաստատել է 2015-2020 թվականներին Ադրբեջանի համար գործընկերության մասին շրջանակային փաստաթուղթը (CPF)՝ դրա բովանդակությունը մինչ այժմ գաղտնի է պահվում։
Փաստաթղթի հրապարակման վրա արգելք է դրել Ադրբեջանի կառավարությունը, որն ավելի վաղ նույնպես արգելել էր ԱՄՀ-ի Ֆինանսական սեկտորի գնահատականների երկրորդ ծրագրի (FSAP) արդյունքների հրապարակումը։ ԱՄՀ-ի Գործադիր խորհուրդը դեռևս հուլիսի 17-ին ավարտել էր Ադրբեջանի Ֆինանսական սեկտորի կայունության գնահատականների (FSSA) դիտարկումը, որն անցկացվել է ընթացիկ տարվա գարնանը։ Սակայն տվյալ դեպքում պաշտոնական Բաքուն արգելել է հրապարակել դրանք։
Ոչինչ հայտնի չէ նաև 2011-2014 թվականներին Ադրբեջանի հետ Համաշխարհային բանկի Համագործակցության ռազմավարության արդյունքների մասին։ 2010 թվականի հոկտեմբերին ՀԲ-ը հայտարարեց, որ 1 միլիարդ դոլար է հատկացրել հետևյալ երկու ուղղությունների համար. գործարար կլիմայի բարելավման ճանապարհով ոչ նավթային ոլորտի ուժեղացում և սոցիալական ծառայությունների ոլորտի արդյունավետության մեծացում։ Ընդհանուր առմամբ, փաստաթղթում շոշափվել են Ադրբեջանի տնտեսության 19 ոլորտների նախագծեր ու ծրագրեր։ Transparency International-ի վարկանիշային աղյուսակում Ադրբեջանը կոռուպցիայի դեմ պայքարի ոլորտում զբաղեցնում է 126-րդ տեղն աշխարհում։
