Արդբեջանական Salam News գործակալության փոխանցմամբ, Ռուսաստանում Ադրբեջանի դեսպան Փոլադ Բյուլբյուլօղլին անդրադարձել է ղարաբաղյան հակամարտության կարգավորմանը.
«Լեռնային Ղարաբաղում պատերազմը դեռ ընթանում է, ինչի վառ ապացույցը կողմերի շարունակաբար կրած կորուստներն են: Գոյություն ունեն այնպիսի ուժեր, որոնք չեն ցանկանում, որ երկու երկրները կարողանան պայմանավորվել Ղարաբաղի հարցում: Աշխարհը պետք է հասկանա, որ Ադրբեջանի ժողովուրդը «երբեք չի հաշտվի» տարածքների կորստյան հետ: Դրա համար էլ անհրաժեշտ է այդ խնդիրը լուծել:
Այո´, այն ժամանակ Ադրբեջանում խնդիրներ կային, այն ժամանակ Ադրբեջանը թույլ էր, գոյություն չուներ միասնական ղեկավարում: Մինչդեռ այժմ Ադրբեջանն առավել հզոր է թե´ տնտեսական, թե´ ֆինանսական, թե´ ռազմական, թե´ մարդկային ռեսուրսների տեսանկյունից: Մեր բնակչությունն արդեն հասել է 9 միլիոնի, իսկ Հայաստանն օրեցօր դատարկվում է, և «ոչ ոք չգիտի», թե որքան մարդ է մնացել այնտեղ:
Միայն մեր նախագահի «բարի կամքն» ու հեռատեսությունն է նրան հետ պահում զենքի ուժով տվյալ խնդիրը լուծելուց: Եթե Ռուսաստանի միջամտությունն էլ անօգուտ լինի, ապա մենք կկիրառենք «խաղաղության հարկադրել» քաղաքական տերմինը, որն ի հայտ է եկել վերջին տարիներին»:
Հիշեցնենք, որ նախորդ տարի ՄԱԿ-ի հրապարակած տվյալներով, Հայաստանի բնակչության թիվը կազմել է 3.083.000 մարդ: Հաշվի առնելով ընթացիկ ցուցանիշները` ՄԱԿ-ի զեկույցում նշված էր, որ մինչև 2050 թվականը Հայաստանի բնակչության թիվը կկրճատվի 2 տոկոսով` նվազելով մինչև 3.018.000-ի:
Մինչդեռ նույն աղբյուրի հաղորդմամբ, նախորդ տարի Ադրբեջանի բնակչությունը կազմել է 8.832.000 մարդ: Կանխատեսումների համաձայն, մինչև 2050 թվականն այդ ցուցանիշն աճելու է 19.78 տոկոսով` հասնելով 10.579.000-ի:
