Թաիլանդում ծխախոտ արտադրողները բողոքում են տուփերին «նախազգուշացնող գոտին» մեծացնելու դեմ: Նախաձեռնության հեղինակը առողջապահության նախարարությունն է: Այն նախատեսում է աշխարհում ռեկորդային՝ տուփի 85% ծավալի վրա փակցնել նախազգուշական գրություններ, նշաններ և սարսափազդու լուսանկարներ:
Համաձայն նոր կանոնների՝ «նախազգուշացնող գոտին» մոտ ապագայում պետք է այնքան ընդլայնվի, որ գրավի ծխախոտատուփի գրեթե ամբողջ մակերեսը, իսկ արտադրողի ապրանքային նշանը պետք է տեղադրվի տուփի ներքևի հատվածում:
Թաիլդանդի կառավարությունը մտադիր է հասնել նրան, որ ծխախոտի վնասի մասին զգուշացնող գրությունը ու լուսանկարն այնքան տեղ զբաղեցնեն տուփի վրա, որ մյուս տեղեկությունների համար գրեթե տեղ չմնա:
Արդեն հիմա Թաիլանդում վաճառվող ծխախոտատուփերի մակերեսի 55%-ը գրավում են ծխախոտ ծխողների ձեռքերը, վիզը, դեմքն ու թոքերը պատկերող սարսափազդու լուսանկարներ:
«Նախազգուշացնող գոտու» ծավալի ավելացումը խիստ քննադատության է արժանացել անգամ պետական գործակալությունների կողմից՝ հաղորդում է ITAR-TASS-ը:
Ներկայում «անվտանգության գոտու» մեծացման ռեկորդը պատկանում է Ավստրալիային, որի ծխախոտատուփերի 82.5% ծավալը ծածկված է ծխելու վնասի մասին նախազգուշացումներով:
