Թուրքական Radikal թերթի փոխանցմամբ՝ բրիտանական The Times թերթը գրել է, որ Թուրքիան սկսել է կռվել ԴԱԻՇ-ի դեմ պայքարողների դեմ։ Թերթը հիշեցնում է, որ Թուրքիան սկսել է ավիահարվածներ հասցնել «Քրդստանի աշխատավորական» կուսակցության (PKK) դիրքերին, ինչը որակել է որպես աղետալի վտանգավոր բան, խելագարություն, և ընդգծել է, որ Թուրքիայի նախագահ Ռեջեփ Էրդողանը պետք է հետքայլ կատարի։
Թերթն ընդգծում է, որ պաշտոնական Անկարան այդ թշնամանքը վերակենդանացնելու համար չէր կարող ընտրել ավելի վատ ժամկետ. «Նախորդ 18 ամիսներին ԴԱԻՇ-ի դեմ ամենաարդյունավետ պայքարը մղել են PKK-ին մոտ կանգնած Սիրիայի քրդերի Ժողովրդական ինքնապաշտպանության ջոկատները (YPG) և Էրբիլից (Հյուսիսային Իրաքի քրդական ինքնավարության կենտրոն) ղեկավարվող Փեշմերգայի ուժերը:
Քրդերի դիրքերի թուլացումը նպաստում է, որ ԴԱԻՇ-ը հյուսիսում ընդլայնի իր վերահսկողության տակ գտնվող տարածքները և համախմբի ուժերը, իսկ հարավում՝ մոտենա Բաղդադին։ Բացի այդ, ռմբակոծությունները փոքր կոնֆլիկտներ են առաջացնում Թուրքիայի քրդերի ու անվտանգության ուժերի միջև, որոնք վերաճելով՝ կարող են Թուրքիան վերածել արյունալի ու սարսափելի դժոխքի»։
