Irib News-ի փոխանցմամբ՝ Իրանի նախագահ Հասան Ռուհանին հայտարարել է, որ Իրանը չի ձգտում տարածքներ գրավել։ Նա այդ մասին հայտարարել է երեկ Իրանի արևմուտքում գտնվող Քուրդիստան նահանգ կատարած այցի ժամանակ, որտեղ նա հանդիպել է ուլեմաների ու պատերազմի վետերանների հետ:
«Իրանի ռազմական ռազմավարությունը պաշտպանական ու զսպիչ է։ Իրանի Իսլամական Հանրապետությունը ըստ էության չի ձգտում նվաճել որևէ տարածք։ Արևմտյան մի շարք պաշտոնյաներ հայտարարում են, որ միջուկային բանակցությունների արդյունքներով իրենց հաջողվել է կանխել Իրանում միջուկային զենքի ստեղծումը։ Նման հայտարարությունները միայն պատրանք են։ Եթե որևէ մեկը ցանկանում է ստեղծել միջուկային զենք, ապա նա չի համաձայնի ԱԷՄԳ-ի կողմից ավելի լայն վերահսկողություն իրականացնելուն։
Իրանում առկա է կայունություն ու անվտանգություն՝ չնայած հարևան երկրներում տիրող լարված իրավիճակին։ Այդ անվտանգությունն այն բանի արդյունքն է, որ ժողովուրդը հավաքվել է Իսլամի ու Իրանի դրոշի ներքո՝ շնորհիվ Իսլամական հեղափոխության մեծ առաջնորդի ու միասնական Սահմանադրության առկայության։
Համաձայնագրից հետո առաջացած նոր մթնոլորտում էլ ավելի միասնության ու համերաշխության շնորհիվ կարագանա Իրանի տնտեսական բարգավաճումն ու բազմակողմ կայուն զարգացումը, և որ այդ նպատակին հասնելու համար անհրաժեշտ է մեծացնել արտադրությունն ու ոչ նավթային արտահանման ծավալը»,- ասել է նա։
