«Արմավիա» ավիաընկերությունը մի քանի ամիս առաջ, դեռ անցած տարվա վերջին, ռուսական «Միացյալ ավիաշինական կորպորացիա»-ին է վերադարձրել Sukhoi Superjet-100 ինքնաթիռը: Ավիաընկերությանը մոտ կանգնած «Առաջին լրատվական»-ի աղբյուրը հայտնեց, որ անցած տարի կորպորացիայի հետ աղմկահարույց պատմությունից հետո, երբ «Արմավիա»-ն հրաժարվել էր ինքնաթիռների շահագործումից, իսկ հետո քաղաքական միջամտության արդյունքում SSJ-ը կրկին բերվել էր Հայաստան, այն այլևս չէր շահագործվել՝ ելնելով անվտանգության նկատառումներից: SSJ-ը շատ թանկարժեք է նաև շահագործման տեսնակյունից, դրա պահեստամասերը թանկ են և կան միայն «Միացյալ ավիաշինական կորպորացիա»-ում:
Մեր զրուցակիցը հերքեց նաև օրերս մամուլում հայտնված տեղեկությունը, թե «Արմանվիա»-ն ծրագրում է նոր ինքնաթիռներ գնել: Հիշեցնենք, որ անցած տարվա հուլիսին Ֆարնբորոյի ավիացուցասրահում Միխայիլ Բաղդասարովը հանդիպել էր Boeing և Airbus ընկերությունների ներկայացուցիչների հետ, և նրանք քննարկել էին 1 Airbus-А320 և 2 Boeing 737-700 ու 737-800 ինքնաթիռներ ձեռք բերելու հարցը: Սակայն դրանից հետո այլևս հանդիպում չի եղել, և բանակցությունները չեն շարունակվել, ու թե երբ կրկին կհանդիպեն ընկերությունների ղեկավարները՝ պարզ չէ:
Հիշեցնենք, որ «Արմավիա»-ին առաջիկայում մեծ փորձություն է սպասվում. այս ամսին ավարտվում է ավիափոխադրողի լիցենզիայի ժամկետը, և հայտնի չէ՝ այն ընդհանրապես կշարունակի գործել, թե կզրկվի իր լիցենզիայից:
Հավելենք, որ ներկայում «Արմավիա»-ն շահագործում է երկու Airbus A320, երեք CRJ-200LR և երեք Boeing737-55S ինքնաթիռներ, բոլորն էլ՝ վարձակալությամբ:
