Սուրիկ Խաչատրյանի որդու ձերբակալումն անցավ առանց մեծ հասարակական աժիոտաժի: Սրա պատճառն իհարկե միանգամայն հասկանալի է: Իսկ պատճառը ամենևին այն չէ, որ ձերբակալումն իրականացվել է շաբաթ օրը՝ երեկոյան, երբ աժիոտաժի հիմնական աղբյուր հանդիսանալիք երևանյան ակտիվ հանրությունը գուցե ինչ-որ տեղ փորձում էր թաքնվել անասելի շոգից և լրահոսին հետևելու և արձագանքելու ժամանակ ու տրամադրություն չուներ: Պատճառը, որ Սուրիկ Խաչատրյանի որդու ձերբակալությունն աժիոտաժի չի արժանացել, նրա նույն որդու առաջին ձերբակալությունն էր Բուդաղյանների գործով, որում նա կասկածվում էր Ավետիք Բուդաղյանին սպանելու համար: Հետո զինդատախազ, իսկ այսօր արդեն գլխավոր դատախազ Գևորգ Կոստանյանը որոշեց, որ նա ընդամենը ինքնապաշտպանվել է: Սերժ Սարգսյանն էլ հաստատեց այդ որոշումը, Սյունիքի մարզպետի որդին ազատ արձակվեց, ազատ արձակվեց նաև մարզպետի թիկնապահը, իսկ որոշ ժամանակ անց էլ հրաժարական տված մարզպետը կրկին վերադարձավ իր պաշտոնին:
Հասարակությունը հետևանքը զգալու առումով շատ չսպասեց, և տեղի ունեցավ Սդղի գյոլի հայտնի միջադեպը, որտեղ բարեբախտաբար զոհեր չկան, բայց կան ծանր հետևանքներ՝ մարզպետի որդին և նրա ընկերները ծեծել ու տեսողությունից զրկել են մի երիտասարդի: Եվ այդ ամենից հետո, երբ հիմա ձերբակալվում է Սուրիկ Խաչատրյանի որդին, հասարակությունը ընդամենը սպասում է, թե նա երբ է ազատ արձակվելու և պատրաստվելու հերթական ամենաթողության դրսևորմանը:
Այսինքն՝ հասարակությունն այլևս աժիոտաժի ժամանակ ու տրամադրություն չունի, որովհետև եթե Լիսկայի որդուն ձերբակալել են, ուրեմն դա նշանակում է, որ շուտով նրան ազատ կարձակեն, և սրանով իսկ կտան հերթական անպատժելիության քարտ-բլանշը: Եվ ուրեմն՝ Լիսկայի որդուն ձերբակալել են՝ պաշտպանիր, ով կարող է: Համենայն դեպս, հանրությունը որևէ վստահություն չունի, որ Հայաստանի իրավապահները կլինեն հետևողական, սկզբունքային և կհետևեն օրենքին ու օրինականությանը, իսկ Սերժ Սարգսյանն էլ, վերադառնալով արձակուրդից, չի հրահանգի ազատ արձակել համակարգի լավագույն ներկայացուցիչներից մեկի որդուն:
Կասկած չկա, որ ամեն ինչ կախված է Սերժ Սարգսյանի կամքից, և նա կա՛մ տվել է Լիսկայի որդուն ձերբակալելու հրահանգ, կամ էլ իրավապահներին հորդորել է գործել ինչպես օրենքն է պահանջում՝ այդպիսով նրանց ազատելով կաշկանդվածությունից:
Թե ինչու է Սերժ Սարգսյանը գնացել նման քայլի և ինչքան ժամանակով՝ ահա որն է հարցը: Որովհետև, եթե խնդիրը իսկապես իրավունքը, օրենքը, օրինականությունն ու բարոյականությունն են, որ վերջապես կարող են հաղթել Հայաստանի իշխանության գործողություններով, թեկուզ փոքր դրվագներում, ապա հաջորդ քայլը պետք է լիներ Սյունիքի մարզպետի պաշտոնից Լիսկայի երկրորդ և վերջին հրաժարականը:
Եվ ուրեմն, քանի դեռ Սուրիկ Խաչատրյանը իր պաշտոնին է, նշանակում է, որ նրա որդին վաղ թե ուշ հայտնվելու է անպատժելիության և իշխանությունների խնամքի ներքո: Եվ ավելին՝ ո՞վ գիտե, թե նրան ինչ-որ բանից պաշտպանելու համար չէ՞, որ ձերբակալել են:
