Իրավապահ ոլորտի «Հայկական ժամանակի» աղբյուրները հայտնում են, որ Գյումրիի նախկին քաղաքապետ Վարդան Ղուկասյանի պաշտոնավարման շրջանի փաստաթղթային ստուգումների արդյունքում՝ միայն 440 միլիոն դրամի կեղծ ասֆալտապատման մասին վկայող փաստաթղթեր են հայտնաբերվել:
Անցյալ տարեվերջին տեղեկացրել էին, որ ֆինանսների նախարարությունը ստուգումներ է սկսել Գյումրիի քաղաքապետարանում: Ավելի ուշ այդ ստուգումների արդյունքներն ուղարկվել էին ՀՀ ոստիկանություն: Շաբաթներ առաջ ոստիկանությունից «ՀԺ» թղթակցին պաշտոնապես հայտնել էին, որ ստուգումների արդյունքում քրեական գործ է հարուցվել, կատարվում է նախաքննություն: Երեկ «ՀԺ» թղթակիցը պարզել է, որ 440 մլն դրամի կեղծ ասֆալտապատման փաստաթղթերը ներառված են նույն քրգործում:
Կներգրավվի՞ Վարդան Ղուկասյանն այդ գործում որպես կասկածյալ, դեռ պարզ չէ: Համապատասխան մարմինները ոչ պաշտոնապես հաստատեցին ընդամենը, որ մի քանի հարյուր միլիոն դրամի չարաշահման մասին է խոսքը՝ ոչ միայն Գյումրիի ասֆալտապատման, այլ նաև աղբահանության և այլ ոլորտներում:
