Վատիկանը բացահայտել է այն տեխնոլոգիաները, որոնց շնորհիվ հաջողվում է անհրաժեշտ գույնի ծուխ ստանալ: Ծուխը հավատացյալներին տեղեկացնում է Հռոմի նոր պապի ընտրության ընթացքի մասին: RIA Novosti-ի փոխանցմամբ՝ այս մասին հայտնի է դարձել Սուրբ գահի կայքից:
Ըստ ավանդույթի՝ Սիքստինյան կապելլայի խողովակից բարձրացող ծուխը հավատացյալներին տեղեկացնում է՝ նոր Պապ ընտրվե՞լ է, թե՞ ոչ: Եթե ծուխը սև է, ուրեմն քվեարկությունը դեռևս արդյունք չի տվել, եթե սպիտակ՝ նոր Պապն ընտրված է:
Որպեսզի խողովակից սև ծուխ բարձրանա, օգտագործում են կալիումի պերքլորատի, անտրացենի (բյուրեղային ածխաջրածին) և ծծմբի խառնուրդ: Սպիտակ ծխի համար այրում են բերտոլետյան աղ, լակտոզա և բևեկնախեժ:
Երեքշաբթի օրը Սիքստինյան կապելլայի խողովակից կոնկլավի առաջին նիստից հետո սև ծուխ է բարձրացել:
