Ադրբեջանական Apa լրատվական գործակալության փոխանցմամբ, Ադրբեջանում գտնվող Ռումինիայի նախագահ Տրայան Բեսեսկուն ադրբեջանական լրատվամիջոցներին տված հարցազրույցի ժամանակ անդրադարձել է ադրբեջանա-ռումինական հարաբերություններին և Լեռնային Ղարաբաղի հիմնախնդրի կարգավորմանը.
«Ադրբեջանի հետ համագործակցությունը մեզ համար շատ կարևոր է, քանի որ Ադրբեջանը կամրջի դեր է խաղում Կասպյան ավազանում: Կարծում եմ, որ մեր բոլոր նախաձեռնություններն իրատեսական են և իրագործելի: Վստահ եմ, որ հետագայում մեր համագործակցությունն աճելու է:
Ինչ վերաբերում է ղարաբաղյան հիմնախնդրի կարգավորմանը, ապա Ռումինիան մեծապես անհանգստացած է այդ «սառեցված» հակամարտության կարգավորման ձգձգմամբ: Այդ հակամարտության գոտին սահմանակցում է Սևծովյան ավազանի հետ: Կարծում եմ, որ այդ տարածաշրջանը, Ռումինիայից բացի, ծայրահեղ կարևորություն է ներկայացնում նաև ՆԱՏՕ-ի և ԵՄ-ի համար:
Վստահ եմ, որ այդ հիմնախնդիրը պետք է լուծում ստանա միջազգային իրավունքի նորմերի շրջանակներում: Գլխավոր սկզբունքի դերում պետք է հանդես գան երկրի տարածքային ամբողջականությունը և ինքնիշխանությունը: Հուսով եմ, որ ղարաբաղյան հակամարտությունն իր լուծումը կստանա հենց այդ սկզբունքների հիման վրա»:
Հիշեցնենք, որ Բեսեսկուի ադրբեջանական այցի շրջանակներում կողմերը ստորագրել են 4 միջկառավարական փաստաթուղթ: Իսկ նախորդ տարվա փետրվարի սկզբին Ադրբեջանն ու Ռումինիան կնքել էին էներգետիկ ոլորտին առնչվող մի հուշագիր, որով նախատեսվում էր ադրբեջանական գազը հեղուկացնել Վրաստանի տարածքում, ապա այն Սև ծովով առաքել դեպի Ռումինիա: