Ադրբեջանական Turan լրատվական գործակալության փոխանցմամբ՝ Ադրբեջանի պետական նավթային հիմնադրամի ակտիվներն այս տարվա առաջին կեսին կրճատվել են 3.56 տոկոսով՝ նվազելով մինչև 35 միլիարդ և 783 միլիոն դոլարի։ Այդ մասին նշված է հիմնադրամի տարածած հայտարարության մեջ։
Դրանում նշված է, որ 2015 թվականի հունվար-հունիս ամիսներին հիմնադրամի եկամուտները կազմել են 4 միլիարդ և 54 միլիոն մանաթ (1 մանաթը հավասար է 0.95 դոլարի), իսկ ծախսերը՝ 4 միլիարդ և 42 միլիոն մանաթ։ Նավթի ու գազի վաճառքից ստացված մուտքերը կազմել են 3 միլիարդ և 802 միլիոն մանաթ, իսկ տարանցիկ մուտքերը՝ 5.7 միլիոն մանաթ։
Հիշեցնենք, որ 2015 թվականի հունվարի 31-ի դրությամբ` Ադրբեջանի պետական նավթային հիմնադրամի ակտիվները կազմել են 37.1 միլիարդ դոլար: 2015 թվականի ապրիլին Caspian Barrel նավթային հետազոտությունների կենտրոնի ղեկավար Իլհամ Շաբանը հայտարարել էր, որ Ադրբեջանը նավթի վաճառքից տարեկան ստացել է 20 միլիարդ դոլար, և որ նավթի գնանկման հետևանքով տարեկան եկամուտները կրճատվել են 5-6 միլիարդ դոլարով:
«2014 թվականի արդյունքներով` Ադրբեջանն ընդհանուր առմամբ արտահանել է 23.5 միլիարդ դոլարի հում նավթ: Նույն նախորդ տարում Ադրբեջանի պետական նավթային հիմնադրամը նավթի վաճառքից շահույթի տեսքով ստացել է մոտ 15.2 միլիարդ դոլար: Մինչդեռ պիկային համարվող 2011 թվականին նավթի վաճառքից Ադրբեջանի պետական նավթային հիմնադրամի հաշվեհամարին մուտք է արվել ավելի քան 19 միլիարդ դոլար։ Ադրբեջանում նավթի արդյունահանման ծավալը նվազել է ավելի քան մեկ միլիոն տոննայով: և պետական նավթային հիմնադրամը լավագույն դեպքում այս տարի նավթի վաճառքից կստանա 7.5 միլիարդ դոլար»,- ասել է նա։
