Եգիպտոսի մայրաքաղաք Կահիրեում տասնյակ եգիպտացի քրիստոնյաներ երկուշաբթի երեկոյան անժամկետ գործադուլ են սկսել Լիբիայի դեսպանատան մոտ՝ բողոքելով Տրիպոլիի բանտում ղպտիի մահվան և վերջինիս ընկերներին բանտում պահելու դեմ: Ինչպես հաղորդում է ITAR-TASS-ը, հավաքվածները պահանջել են երկրից վտարել Լիբիայի դիվանագիտական ներկայացուցչության ղեկավարին և Եգիպտոս վերադարձնել իրենց հայրերնակիցներին:
Նշենք, որ մարտի սկզբին Լիբիայի Բենղազի քաղաքի անվտանգության ուժերը հայտարարել են հարևան երկրից մի խումբ քրիստոնյաների ձերբակալության մասին և նրանց մեղադրել են իրենց հավատքը տարածելու մեջ: Տեղի ուժայինների խոսքերով՝ ձերբակալվածների մոտից առգրավվել է Աստվածաշունչ, Հիսուս Քրիստոսի և ղպտիական եկեղեցու նախկին պատրիարք Շենուսա 3-րդի պատկերներ, միսիոներական գրականություն: Բացի այդ, նրանց մեղադրել են նաև Լիբիա անօրինական մուտք գործելու մեջ:
Հարցաքննությունից հետո ղպտիներին Բենղազիից տեղափոխել են Տրիպոլի: Կիրակի հայտնի է դարձել, որ ղպտիներից մեկը՝ 45-ամյա Իզզաթ Աթալան, մահացել է: Վերջինիս հարազատները հայտարարել են, որ նա մահացել է կտտանքների հետևանքով:
Երկուշաբթի երեկոյան Կահիրեում Լիբիայի դեսպանատան մոտ հավաքված մարդիկ, ի նշան բողոքի, պատռել և այրել են Լիբիայի դրոշը, կոտրել են շենքի մոտ տեղակայված տեսախցիկները, քարեր են նետել դեսպանատան շենքի վրա և հակալիբիական կարգախոսներ են հնչերցրել:
Լիբիայում եգիպտացի դիվանագետների տվյալներով՝ Աթալայի մահը վրա է հասել «բնական պատճառներով»: Հայտնի է, որ նա տառապել է շաքարախտով և սրտի վիրահատություն է ունեցել:
Եգիպտոսում ղպտիտները կազմում են 84 միլիոն բնակչության 10%-ը:
