Ռուսական RIA Novosti լրատվական գործակալության փոխանցմամբ՝ Իրանի վառելիքի հարցերով փոխնախարար Ամիր Հուսեին Զամանինիան հայտարարել է, որ Իրանը կարող է 5-10 տարվա ընթացքում սկսել հեղուկացված գազի մատակարարումներ Եվրոպային.
«Իմ դիտարկմամբ՝ ներկայումս մենք չունենք գազ՝ իրանցիներից բացի ուրիշներին մատակարարելու համար, բայց երբ կամ եթե արդյունահանենք բավականաչափ գազ, արդեն իսկ կլինի տնտեսական նպատակահարմարությունը, որն ի ցույց կդնի, թե որ ուղղությամբ է պետք գնալ։
Ներկայումս Եվրոպայում գազի գինը շատ ավելի պակաս է, քան Արևելյան Ասիայում։ Իրանի համար անիմաստ է մտածել խողովակաշարով Եվրոպա գազ մատակարարելու մասին։ Սակայն հեղուկացված գազն այլ բան է։ Դրա մատակարարումը հնարավոր կլինի 5-10 տարի անց, բայց ոչ այժմ։ Եվրոպան հեռանկարում կարող է իրանական գազի համար դառնալ վաճառաշուկա, և որ Իրանը, վերջին հաշվով, մտադիր է դառնալ խոշորագույն գազամատակարարներից մեկն աշխարհում»,- ասելէ նա։
Փոխնախարարի խոսքով՝ ակնկալվում է, որ Իրանի նավթագազային ոլորտի հանդեպ պատժամիջոցները կարող են վերացվել հոկտեմբեր-նոյեմբերին, եթե չպլանավորված որևէ բան տեղի չունենա Իրանի խորհրդարանում ու ԱՄՆ Կոնգրեսում։ Զամանինիան հավելել է, որ ներկայումս Իրանում օրական արդյունահանվում է 1.1 միլիարդ խորանարդ մետր գազ, ինչը հաստատում է նրա դիրքերը որպես գազի երրորդ խոշոր արդյունահանող աշխարհում։
