«Մենք ասում ենք՝ ընտրությունները կեղծվել են, և ամեն ինչ անելու ենք սահմանադրության շրջանակներում, որ ՀՀ-ում իշխանությունը ձևավորվի ժողովրդի քվեով: Մենք պայքարելու ենք այդ ուղղությամբ: Ինչ մարտավորություն կկիրառվի, մանրամասները չեմ բացահայտի, բայց մենք գնում ենք ժողովրդի ձայների հետևից: ՍԴ-ն է ի զորու որոշել երկորրդ փուլ անցկացնելու հարցը, և մանևրի դաշտ ստեղծել իշխանության համար: Բայց մինչ այս ՍԴ-ից տպավորությունը բավականին տխուր է»,- այսօր Ազատության հրապարակում ասուլիսի ժամանակ հայտարարեց ԱԺ «Ժառանգություն» խմբակցության ղեկավար Ռուբեն Հակոբյանը:
Նա «ծաղր» անվանեց հանրապետականների դիրքորոշումը, որ չեն մերժում փող բաժանելու փաստը, բայց ասում են՝ բողոքողներ չկան, այն դեպքում, երբ իրենց քրեական տարրերը ահաբեկում են մարդկանց ու արդեն տրված բողոքն էլ ստիպում են ետ վերցնել: Ռ.Հակոբյանը հայտարարեց, որ այս պահը և ՍԴ որոշումը ճակատագրական է Հայաստանի համար և կոչ արեց խղճի մտոք գործել:
Անդրադառնալով Սերժ Սարգսյանի և Վլադիմիր Պուտինի առաջիկա հանդիպմանը՝ Ռ.Հակոբյանը նշեց, որ դա ՀՀ «քաղաքական պրոտոկոլի մաս» է կազմում, որ ընտրված կամ չընտրված նախագահը առաջինն այցելում է ՌԴ. «Կան թեկնածուներ, որ ցանկալի են ՌԴ համար, ու նրանք շահարկում են, որ ռուս ժողովուրդը իսկապես ռազմավարական դաշնակից է, բայց դա թույլ, դրսից տղա կանչողի քայլ է: Ոչ մի նորմալ մարդ չի ասի՝ ինձ ՌԴ-ն կամ ԱՄՆ-ը պաշտպանում են, ինձ ձայն տվեք: Ինքնիշխան պետության ղեկավարը, եթե այդ կոդով է առաջնորդվում, դա շատ վտանգավոր է: Մենք ինքնիշխան պետություն ենք և մենք պետք է որոշենք: Եվ հզոր Հայաստանը շատ ավելի շահեկան է Ռուսաստանի համար, ու ռուս ժողովուրդը պետք է տեսնի, որ իր դաշնակիցը ոչ թե Տեր-Պետրոսյանը, Քոչարյանը, կամ Սարգսյանն է, այլ հայ ժողովուրդը»:
«Հավատում եմ, որ մինչև ապրիլի 9-ը բան է փոխվելու: Ես հավատում եմ, որ ի վերջո այս հավաքական գիտակուցությունը, որի հիմքում արժանապատվություն է և պետությունը ժողովրդի քվեով ղեկավարելու սկուզբունքն է, սրան լռեցնել հնարավոր չի»,- ասաց Ռ.Հակոբյանը:
Լուսանկարը PanARMENIAN Photo-ի
