Հայկական, այսպես կոչված, էլիտան հուլիսի 22-ին «ազգին» հերթական եկեղեցին է մատուցել: Երեկ Նոր Հաճընում բացվել է ԲՀԿ նախկին նախագահ և նախկին «հայկական Իվանիշվիլի» Գագիկ Ծառուկյանի կառուցած նոր եկեղեցին, որը նրա կառուցած յոթերորդ եկեղեցին է: Եկեղեցու բացմանը հավաքվել են հայկական իշխանական ու այսպես կոչված՝ ոչ իշխանական ուժերի հայտնի ներկայացուցիչները՝ Սերժ Սարգսյանի գլխավորությամբ:
Ի տարբերություն Գագիկ Ծառուկյանի կառուցած վեցերորդ՝ Աբովյան քաղաքի եկեղեցու օծման արարողության, այս անգամ բացակայում էին Ծառուկյանին հեղափոխականություն ներշնչող ՀԱԿ-ի ներկայացուցիչները: Մնացյալ բոլորը կարծեք թե տեղում էին՝ ցույց տալու համար երևի թե, թե ինչքան են սիրում ազգին, որ բաց չեն թողնում նրա համար կառուցված որևէ մի եկեղեցու օծման արարողություն:
Ե՛վ Գագիկ Ծառուկյանի քաղաքական ու հետքաղաքական դերակատարման, և՛ Սերժ Սարգսյանի ու նրա «գնա մեռի արի սիրեմ» փիլիսոփայության ներքո մերձեցման, և՛ նաև եկեղեցիների բացման «ազգանվեր» գործի մասին շատ-շատ է խոսվել, և այստեղ, ըստ էության, ասելու այլ բան չկա էլ: Ընդամենը արձանագրենք, որ հերթական անգամ տեղի է ունեցել ազգային միասնության ցինիկ մի ակտ, երբ հայաստանյան տնտեսական, քաղաքական և հոգևոր, այսպես կոչված, էլիտաները պարզապես ծաղրուծանակի են ենթարկել Հայաստանի քաղաքացիների սոցիալ-տնտեսական ծանր վիճակը: Իսկ այդ ծանակի կարգախոսն այս անգամ հեղինակել է Ամենայն հայոց կաթողիկոսը՝ ի պատասխան ժողովրդի սոված լինելու մասին լրագրողների հարցերի հայտարարելով, որ ժողովուրդն իր սովը կհագեցնի եկեղեցիներով:
Ժողովուրդն իր սովը, իհարկե, կհագեցնի, կգտնի իր հոգևոր սնունդը: Բայց ե՞րբ է հագենալու Հայաստանի իշխանական, հոգևոր «էլիտա» կոչվածը, ե՞րբ է հագենալու ցինիզմից և հասարակության հանդեպ անտարբերությունից, ե՞րբ է հագենալու հասարակության և պետության հաշվին կյանքի վայելքները ըմբոշխնելու, իսկ այդ ճանապարհին գործածները կառուցվող եկեղեցիներով ծածկելու պրակտիկայից:
Ինչքան Հայաստանում սոցիալ-տնտեսական վիճակը վատթարանում է, այնքան հայկական էլիտան իրեն նվիրում է եկեղեցաշինությանը՝ դրանով իսկ կարծեք թե լավագույնս ի ցույց դնելով և՛ սեփական կրոնա-քաղաքական անմեղսունակությունը, որովհետև հասարակության հաշվին հարստանալն ու եկեղեցիներ կառուցելով այդ հարստությունն իբր հանրությանը վերադարձնելը որևէ կապ չունի կրոնի հետ, և՛ ի ցույց դնելով հասարակության ու պետության ճակատագրի հանդեպ ծայրաստիճան ցինիզմով լեցուն անտարբերությունը:
Այլ կերպ ասած՝ հայկական «էլիտան» շարունակում է զվարճանալ Հայաստանում սոցիալ-հոգեբանական անկման ֆոնին, այսպես ասած՝ յուրօրինակ «սելֆի» անել հասարակության ու պետության նվաղող ֆոնին, խաղալով պետության ու հասարակության ճակատագրի հետ:
