Վրաստանի նախագահ Սաակաշվիլու առաջնորդած Ազգային շարժում կուսակցության գլխավոր քարտուղար Վանո Մերաբիշվիլին ազգաբնակչությանը կոչ է արել, անկախ քաղաքական ուղղվածությունից և նախասիրություններից, մասնակցել ակցիային, որը տեղի կունենա ապրիլի 19-ին Ռուսթավելի պողոտայում և կրկին կցուցադրի վրաց ժողովրդի քաղաքական կամքը:
Մերաբիշվիլու խոսքերով՝ անցած շաբաթ Եվրախորհրդարանի պատգամավորների մի խումբ նամակ է ուղղարկել Վրաստան, որը ստորագրել են տարբեր երկրների և ֆրակցիաների ներկայացուցիչներ:
«Այս նամակը շատ անհանգստացնող է: Վերջին տարիներին սա առաջին այսպիսի ուղերձն է, երբ Եվրախորհրդարանի անդամներն իրենց անհանգստությունն են արտահայտում Վրաստանի ապագայի հանդեպ: Հենց այդ պատճառով էլ Ազգային շարժումը հանրությանը կոչ է անում, անկախ կուսակցական պատկանելությունից և քաղաքական կողմնորոշումներից, ապրիլի 19-ին հավաքվել Ռուսթավելի պողոտայում և կրկին ցուցադրել վրաց ժողովրդի քաղաքական կամքը»,-ասել է Մերաբիշվիլին:
Նրա խոսքերով՝ Վրաստանի զարգացման ճանապարհը տանում է միայն Եվրոպա և ՆԱՏՕ:
«Մենք հայտ ենք ներկայացրել: Սա խաղաղ ակցիա է, և մենք կրկին ցույց կտանք կառավարությանը և Եվրոպային, որ վրաց ժողովրդի կամքն աննկուն է: Ես գիտեմ, որ այս ակցիային կմիանան շատ ոչ կառավարական ուժեր: Այս ակցիան ուղղված չէ մեր հարևաններից և ոչ մեկի դեմ, մենք հարգում ենք նրանց ընտրությունը, սակայն Վրաստանի ուղին Վրաստանի ուղին է»,- ասել է Մերաբիշվիլին:
Նա ավելացրել է նաև, որ կարևոր է ոչ միայն մասնակիցների քանակը, այլև այն, որ ներկայացված լինեն բոլոր շրջանները:
Այն հարցին, թե ինչ կարիք կա ակցիա անցկացնելու, եթե խորհրդարանն արդեն հռչակագիր է ընդունել՝ չփոփոխել եվրոպական ուղղվածությունը, Մերաբիշվիլին պատասխանել է, որ եվրոպական ուղղվածությունը միայն հռչակագիր ընդունելը չէ:
