ՄԱԿ-ի գլխավոր քարտուղար Պան Գի Մունը ցավակցություն է հայտնել Թուրքիայում ահաբեկչության զոհերի հարազատներին և կոչ արել պատասխանատվության ենթարկել հանցագործության մեղավորներին։ Այս մասին հայտնում է RIA Novosti-ն։
«Գլխավոր քարտուղարը դատապարտում է ահաբեկչական գործողությունը, որը տեղի է ունեցել թուրքական Սուրուչ քաղաքում և, ինչպես հաղորդվում է՝ խլել է առնվազն 28 մարդու կյանք և վիրավորել ավելի քան 100-ին։ Ոչ մի հակամարտություն չի կարող արդարացնել հարձակումները քաղաքացիական բնակչության վրա»,- ասվում է Պան Գի Մունի հայտարարության մեջ։
Փաստաթղթում նշվում է, որ գլխավոր քարտուղարն ակնկալում է, որ «հանցագործության բոլոր մեղավորները արագ կբացահայտվեն ու պատասխանատվության կենթարկվեն»։
ԵԱՀԿ նախագահ, Սերբիայի արտգործնախարար Իվիցա Դաչիչը և ԵԱՀԿ գլխավոր քարտուղար Լամբերտո Զանիեն դատապարտել են ահաբեկչությունը՝ ցավակցություն հայտնելով զոհերի ընտանիքներին և արագ ապաքինում մաղթելով տուժածներին։ Այս մասին հայտնում է ԵԱՀԿ մամլո ծառայությունը։
«Այդ ահաբեկչությունը ևս փորձ է՝ վախ սերմանելու մեր հասարակություններում։ Չնայած ահաբեկիչների ցանկություններին՝ մենք պետք է միավորվենք ահաբեկչության ու ծայրահեղականության դեմ պայքարում»,- ասել է Դաչիչը։
«Այս հարձակումը ևս մեկ տխուր ապացույց է առ այն, որ բռնի ծայրահեղականությունը չի ճանաչում էթնիկ, կրոնական կամ պետական սահմաններ։ Մենք պետք է ակտիվացնենք համատեղ ջանքերը՝ դիմակայելու ուժերին, որոնք փորձում են կիրառել բռնությունն ու վախը՝ մեզ պառակտելու համար»,- ասել է Զանիեն։
Դաչիչն ու Զանիեն իրենց աջակցությունն են հայտնել Թուրքիայի ժողովրդին ու կառավարությանը։
